“Ишни охиригача етказган бўлардим” – Рамзан Қодиров Алламжоновга нисбатан суиқасдга алоқасига оид хабарлар ҳақида

Рамзан Қодиров собиқ амалдор Комил Алламжоновга уюштирилган суиқасдда “чечен изи” мавжудлиги тўғрисида хабарлар тарқалгани ҳақида ёзган.

Чеченистон раҳбари 10 ноябрь куни ўзининг Telegramʼдаги каналида қолдирган постида “ғарбпараст ва айрим мухолиф кайфиятдаги нашрлар” ўзбекистонлик собиқ амалдорга нисбатан уюштирилган суиқасд изларини ҳатто “унинг ўзига олиб бориб тиркаган”ини таъкидлаган.

Қодиров бу постида Комил Алламжонов номини бевосита тилга олмаган.

“Икки ҳафта аввал Ўзбекистонда ичида мамлакат президенти администрацияси собиқ амалдори бўлган автомобиль ўққа тутилди. Ҳеч ким зиён кўрмади. Гумонланувчилардан бири аллақачон қўлга олинган, тергов барча иштирокчилар ва суиқасд мотивларини аниқлаши керак. Аммо [тергов-суриштирув] натижаларини кутмасдан, мамлакатдаги ғарбпараст ва айрим мухолиф кайфиятдаги нашрлар “чечен изи” ҳақидаги версияни ўртага чиқаришди, кейин эса бу изни менинг ўзимга тиркашди”, ёзган россиялик сиёсатчи.

“Менда сиёсий мақсадлар йўқ” — Комил Алламжонов

Ўзбекистонда икки муҳим воқеа: жамият иккисига ҳам ишонмайдими?

Постида Қодиров айнан қайси нашрларда бу мазмундаги хабарлар тарқалаётганини тилга олмаган.

“Мен бу провокацияга жавоб бермоқчи эмасман… Фақат бир нарсани қўшаман – агар мен ростдан ниманидир режалаштирганимда, ишни юз фоизлик натижа билан охирига қадар етказган бўлар эдим”, таъкидлаган у.

Пости охирида Чеченистон раҳбари ўзи тилга олган бундай хабарларни “қандайдир учинчи шахслар”нинг сиёсий ўйинидаги восита, дея атаган.

Қодиров, шунингдек, бу маълумотларни тарқатаётганларни аниқлаш ишлари олиб борилаётганини ҳам қўшимча қилган.

“Аминманки, ғарбча ёлғонлар услубидаги бошқа мақолалар ҳали яна чиқади. Нима бўлмасин, мен ва Ўзбекистондаги азиз биродарларим биргаликда, албатта, бу провокация ортида ким турганини аниқлаймиз. Иш кетмоқда”, ёзган Қодиров.

Қибрайдаги суиқасд

Ўзбекистон Бош прокуратураси 26 октябрь куни Қибрай туманида Range Rover русумли автомобилга номаълум шахслар бир неча бор ўқ узгани ҳақида хабар берган.

Кейинроқ Ўзбекистондаги айрим нашрлар ҳуқуқ-тартибот органларидаги ўз манбаларига таяниб, машина ичида Президент администрациясининг Ахборот сиёсати департаменти собиқ раҳбари Комил Алламжонов бўлгани ҳақида ёзган.

Октябрь охирига қадар Бош прокуратура расман “Қибрайдаги қотилликка суиқасд” дея аталган ҳолатга доир жиноят иши бўйича жами тўрт гумонланувчи қўлга олинганини маълум қилган.

Расмий хабарларда Алламжоновнинг исми тилга олинмайди ва ҳуқуқни муҳофаза қилувчи органлар Ўзбекистонда қудратли таъсирга эга сиёсатчилардан бири ўлароқ кўрилган ушбу шахс жонига қасд қилишга уриниш мотивлари борасида шу вақтга қадар ҳеч қандай дастлабки тахминни илгари сурмаган.

27 октябрь куни Бош прокуратура мамлакатдаги медиа вакилларига мурожаат қилиб, ёлғон хабар тарқатганлик учун жавобгарликка тортилиш мумкинлигини эслатган ҳамда хабар тарқатишда фақатгина расмий маълумотларга таянишни сўраган.

Шундан бери ўзбек маҳаллий матбуотида мустақил Ўзбекистон тарихида мисли кўрилмаган мазкур ҳолатга оид хабарлар деярли кўзга ташланмаган.

Алламжонов ким ўзи?

Комил Алламжонов Ўзбекистондаги энг таниқли сиёсатчилардан ва ўтган яқин йиллардан бери ўзбек медиасидаги энг катта таъсирга эга шахс ўлароқ кўрилади.

Хусусий бизнес билан шуғулланган Алламжонов Мирзиёев ҳокимиятга келганидан сўнг президент матбуот котиби, АОКА директори каби бир қатор расмий лавозимларда ишлаган.

У 2019 йилдан бери Ўзбекистон президентининг тўнғич қизи Саида Мирзиёеванинг яқин иттифоқчиси бўлиб келган.

Мирзиёева 2023 йил августида расман президент ёрдамчиси лавозимига тайинланиб, мамлакатдаги иккинчи сиёсий шахсга айланганда ҳам бу иттифоқ давом этган.

Шу йил сентябри охирида – ҳужумга учрашидан бир ойча аввал – Алламжонов “бошқа ишга ўтиши муносабати билан” Президент администрациясидан кетган. Унинг янги иш жойи ҳалигача жамоатчиликка ошкор этилмаган.

Ўзбекистон мустақиллигининг 33 йилида лавозимини эгаллаб турган ёки лавозимидан четлатилган сиёсатчига суиқасд ҳодисаси кузатилмаган.

Сайлов арафасидаги хабар ҳукуматдагиларни “шокка солгани”ни айтадилар ўз исми-шарифи очиқланишини истамайдиган расмийлар.

Айримлар буни спектакл деган тахминларни ҳам илгари суришган.

Ўзбекистонни биладиган ҳам хориждаги чет эллик ёки ўзбекистонлик, ҳам мамлакат ичкарисидаги кўплаб таҳлилчиларнинг фикри эса шундай: собиқ расмийга ҳужум Президент Мирзиёев оиласи ичида бораётган ҳокимият учун ички курашдир.

Комил Алламжонов Би-би-сига ўзининг сиёсий мақсади йўқлигини айтганди.