Россия ортиқ таҳдид эмасми – Кремл мамнун...
Сурат манбаси, EPA
Расмий Москва ўзининг жавобини узоқ куттирмади.
АҚШ президентининг янги Миллий Хавфсизлик Стратегиясини олқишлади.
Россия томонига кўра, Трампнинг янги стратегияси кўп жиҳатдан Москванинг қарашига "мос".
Янги Миллий Хавфсизлик Стратегияси
АҚШ маъмурияти 33 саҳифалик ҳужжатни шу кунларда эълон қилган.
Трампнинг янги стратегиясида Россия АҚШ учун таҳдид, деб кўрилмаслиги айтилган.
Ташқи таъсирга қарши курашиш, оммавий миграцияга чек қўйиш ва Европа Иттифоқи илгари сураётган "цензура" амалиётини рад қилиш ҳужжатда бошқа устивор вазифалар сифатида тилга олинган.
Янги ҳужжат Трамп ўзининг аксилмиграцион сиёсатини янада кучайтираётган, устма-уст янги тақиқ ва чекловларга оид баёнотлар билан чиқаётган бир пайтда бўй кўрсатган.
Америка Қўшма Штатлари дунёнинг ўзбекистонликлар ҳам энг кўп бориш илинжидаги давлатларидан бири бўлади, глобал иқтисодий қудрат.
Трампнинг "учинчи дунё давлатларидан муҳожиратни буткул тўхтатиш"га оид ҳалича аниқлик киритилмаган шу кунлардаги айрим ваъдалари шундоқ ҳам улар орасида-да жавобсиз саволлар, ташвиш ва хавотирларни пайдо қилиб бўлган.
Қатор Европа Иттифоқи расмийлари ва таҳлилчилар эса мазкур стратегияга ўзларининг эътирозларини билдиришган.
Улар янги ҳужжатда сўз эркинлигига қаратилган эътиборни савол остига олишган, тилини эса Кремлникига ўхшатишган.
Россия президентининг матбуот котиби эса, "ўзлари кўрган тузатишлар...асосан Москванинг қарашларига мос келиши"ни айтган.
Дмитрий Песковнинг бу хусусдаги суҳбатини кеча, якшанба куни Россиянинг ТАСС ахборот агентлиги чоп қилган.
Путиннинг матбуот котиби "буни ижобий қадам", деб билишларини таъкидлаган.
Аммо Дмитрий Песков қатъий бир хулосага келишдан аввал ҳали бу ҳужжатни яна кўриб чиқишларини ҳам қўшимча қилган.
Трамп, АҚШ оҳангни юмшадими?
Сурат манбаси, Reuters
Трамп янги стратегиясининг Россияга нисбатан оҳанги анчайин юмшоқ ва бу Европа Иттифоқи бундан ташвишда.
Иттифоқ Украина урушига чек қўйишга интилаётган бир паллада бу ўзининг Москвага нисбатан мавқеъини заифлаштириши мумкинлигидан хавотирда.
Трампнинг янги стратегиясида Европа Иттифоқи АҚШнинг мазкур можарога чек қўйиш ҳаракатларига тўсқинлик қилаётганликда айбланади.
АҚШ "Россия билан муносабатларда стратегик барқарорликни тиклаши шарт" экани, бу эса, ўз навбатида, "Европа давлатлари иқтисодиётини барқарорлаштириши" айтилади.
Европа Иттифоқи Украинада тинчлик келишувига эришиш учун Трамп маъмурияти билан музокараларини давом эттирар экан, айрим расмийлар АҚШ билан алоқаларининг мустаҳкамлигини таъкидлаган ҳолда, ҳужжат бўйича айрим "савол"ларни ҳам кўтаришган.
"АҚШ [НАТО] даги энг муҳим иттифоқчимиз бўлиб қолади. Бироқ бу иттифоқ хавфсизлик сиёсати масалаларини ҳал этишга қаратилган", - деб айтган жума куни, жумладан, Германия Ташқи ишлар вазири.
Полша Бош вазири эса ижтимоий тармоқлардаги "Америкалик дўстлари"га йўллаган постида, "Европа сизнинг энг яқин иттифоқчингиз, муаммонгиз эмас", деркан, ўзларининг "душманлари умумий" эканини ҳам тилга олган.
"Агар бирор нарса ўзгармаган бўлса, бу бизнинг умумий хавфсизлигимиз учун ягона оқилона стратегия", - дея давом этган Доналд Туск.
Трампнинг янги стратегиясида эса, "айрим Европа давлатларининг ишончли иттифоқчи бўлиб қолиш учун етарли даражада кучли иқтисодиёт ва Армияга эга бўлишлари ёки йўқлиги" ҳам савол остига олинган.
Европанинг "тамаддуний таназзул қаршисида қолгани" ҳақида ҳам сўз юритилган.
Худди шу манзарада Украина Президенти Володимир Зеленский олий даражадаги музокаралар олиб бориш учун яна Буюк Британияга келмоқда.
У Лондонда Европанинг бир қатор муҳим етакчилари билан учрашади.
Володимир Зеленский Британия, Франция ва Германия етакчилари билан музокаралар олиб боради.
Украинанинг Европадаги иттифоқчилари тинчлик музокараларида ён бериши учун АҚШ томонидан Киевга бўлаётган давомий босимларга ўзларининг жавобларини пишитиб олиш ҳаракатида.
Украина президенти орада Трампнинг тинчлик режаси муҳокамаларида ўзининг ҳудуди билан боғлиқ масала "энг қийини" бўлиб турганлигини айтганди.
Ўзбекистон илова аксарият Марказий Осиё давлатлари ҳам Украина урушининг тинч йўл билан ҳал этилишига тарафдорлик қилиб келишади.
Ўтган ой Вашингтонга сўнгги сафари чоғида президент Шавкат Мирзиёевнинг бу урушни фақат Доналд Трамп тўхтата олишига умид билдирганига оид хабарлар ҳам олинган.
Расмий Тошкент Трампнинг Украина уруши бўйича сўнгги тинчлик режасига ҳалича ўзининг расмий муносабатини билдирмаган.
Лондондаги музокаралар натижаларига қараб, мақола яна тўлдирилиши мумкин.
Сурат манбаси, EPA
Владимир Путин ва АҚШ музокарачилари Украина тинчлик келишуви бўйича муваффақиятга эриша олмаган кўринади.
Россия расмийларига кўра, музокаралар "конструктив" бўлган, аммо Украинага ҳудудий имтиёзлар бўйича келишувга эришилмаган муросага борилмаган.
Шунингдек, Кремл Путин АҚШнинг тинчлик режасини рад этди, дейиш "нотўғри" эканини айтди.
Олдинроқ Путин Европанинг тинчлик келишуви бўйича талаблари "қабул қилиб бўлмас", деб айтганди.
"Биз Европага қарши урушмоқчи эмасмиз, лекин агар Европа биз билан урушмоқчи бўлса, биз ҳозироқ тайёрмиз", дея қўшимча қилган эди Путин.
Украина президенти Владимир Зеленский эса, тинчлик режаси лойиҳасида "ҳали ишлаш керак бўлган жиҳатлар" мавжудлиги, шу билан бирга "урушга барҳам бериш учун ҳозир ҳар қачонгидан кўп имконияти бор"лигини таъкидлаган.
Айни дамда Брюсселда НАТО ташқи ишлар вазирлари давом этаётган тинчлик музокараларини муҳокама қилиш учун учрашмоқда.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
"Путин АҚШнинг тинчлик режасини рад этди, деб айтиш нотўғри"
Виталий Шевченко
Россия бўйича муҳаррир, BBC Monitoring
Сурат манбаси, EPA
Кремл матбуот котиби Дмитрий Песковнинг айтишича, кеча Стив Уиткофф ва Жаред Кушнер билан музокаралар пайтида Президент Путин АҚШнинг тинчликка эришиш бўйича таклифларини рад этди, деб айтиш "тўғри бўлмайди".
Кунлик матбуот анжуманида саволларга жавоб қайтараркан, Песков шундай деди: "Кеча биринчи марта фикрлар бевосита алмашилди. Баъзи нарсалар қабул қилинди, баъзилари қабул қилиб бўлмас дея белгиланди. Бу одатий иш жараёни ва муросани излашдир".
Песков Кремлдаги беш соатлик музокаралар тафсилотларини ошкор қилишдан ҳам бош тортди: "Музокаралар атрофида қанчалик тинчлик сақланса, улар шунчалик самарали бўлади, деган тушунча бор. Биз шу принципга амал қиламиз ва америкалик ҳамкорларимиз ҳам шундай қилишларига умид қиламиз".
Ўтган ҳафта қатор оммавий ахборот воситаларида АҚШ Россиянинг қаттиқ талаблар рўйхатини ўзининг тинчлик режаси сифатида кўрсатишга урингани, Москва билан махфий бизнес музокаралари ўтказгани ва Уиткофф русларга Трамп билан қандай ишлаш бўйича маслаҳат берганига оид таъминлар ўртага ташланганди.
Европа Украинани қандай қилиб қўллаб-қувватлаш масаласида якдил эмас
Ник Бик
Брюссел, BBC мухбири
Сурат манбаси, REUTERS/Yves Herman
Европа Украинага қандай ёрдам бериш бўйича ягона фикрга эга эмас.
НАТО ташқи ишлар вазирлари Украина фронтидан анча узоқда Брюсселдаги бош қароргоҳда учрашишмоқда.
Улар шунингдек, АҚШ бошчилигидаги урушни тўхтатиш ва тинчлик келишувига эришиш ҳаракатларидан ҳам узоқдалар.
Бунга сабаб, Президент Трамп ва унинг жамоаси Европа иттифоқчиларига эмас, балки Россияга яқинлашишга ҳаракат қилмоқда.
Европа эса, аксинча, ҳар сафар Трамп Москвага мойил бўлган пайтда уни тинчлантиришга қайта-қайта уриниб келади.
Бугунги йиғинда юқори мартабали АҚШ расмийлари йўқлиги тўпланган Европа давлатлари ҳарбий қудратларига қарамай, таъсир ва кучлари етишмаслигини кўрсатади.
Америка ташқи ишлар вазири Марко Рубио ёки мудофаа вазири Пит Хегсетҳ йиғинга келмаган.
Бугун эрталаб тингланган қатъий баёнотларга қарамай, Европа Украинага қандай ёрдам бериш ва молиялаштириш бўйича якдил эмас ва АҚШнинг режаларидан деярли четда қолган.
