بیت المقدس میں دھماکہ، کم از کم 21 زخمی

اسرائیل کے طبی حکام کا کہنا ہے کہ یروشلم یا مقبوضہ بیت المقدس میں ہونے والے ایک دھماکے میں کم سے کم 21 افراد زخمی ہو گئے ہیں۔

یہ دھماکہ ایک بس میں ہوا اور طبی اہلکاروں کے مطابق دو زخمیوں کو تشویش ناک حالت میں ہبرون روڈ کے ہسپتال پہنچایا گیا ہے۔

فوری طور پر دھماکے کی وجہ سامنے نہیں آئی ہے۔

اسرائیلی پولیس کے ترجمان کا کہنا ہے کہ اس حادثے کے بارے میں تحقیقات کی جا رہی ہیں۔

بظاہر دھماکے سے تباہ ہونے والی بس خالی تھی لیکن قریب موجود دوسری بس میں سوار لوگ زخمی ہوئے ہیں۔

جائے وقوعہ سے ملنے والی تصاویر میں ایک بس کو مکمل طور پر شعلوں میں لپٹے دیکھا جا سکتا ہے جبکہ دوسری کے کچھ حصے میں آگ لگی ہے۔