نائجیریا کی مسجد میں دھماکوں سے 30 ہلاک

افریقی ملک نائجیریا کے شمال مشرقی شہر میدوغوری میں ایک مسجد میں ہونے والے دو بم دھماکوں میں کم سے کم 30 افراد ہلاک ہوگئے ہیں۔

حکام کا کہنا ہے کہ بظاہر یہ دھماکے خود کش حملوں کا نیتجہ ہیں۔

ایک سینئیر حکومتی اہلکار کا کہنا ہے کہ جس وقت یہ دھماکے ہوئے مسجد میں نماز ادا کی جا رہی تھی۔ ان حملوں میں متعدد افراد زخمی بھی ہوئے ہیں۔

مولائی کے نواح میں ہونے والے ان دھماکوں کے زخمیوں کو مقامی ہسپتال منتقل کیا گیا ہے۔

خیال رہے کہ اس سے قبل بدھ کو میدوغوری میں ہونے والے تین بم دھماکوں میں کم سے کم چار افراد ہلاک ہو گئے تھے۔

میدو گری کو اسلامی گروپ بوکو حرام کے شدت پسند نشانہ بناتے رہتے ہیں۔

بوکو حرام اسلامی شدت پسند تنظیم ہے جو ہمسایہ ممالک کیمرون اور چاڈ میں بھی سرگرم ہے۔ امریکہ نے حال ہی میں بوکو حرام سے لڑنے کے لیے اپنے فوجی دستے کیمرون روانہ کیے ہیں۔