شمالی کوریا کا فوج کو جنگ کے لیے تیار رہنے کا حکم

شمالی کوریا کے سرکاری میڈیا کے مطابق ملک کے رہنما کِم جونگ ان نے جنوبی کوریا کے ساتھ جمعرات کو ہونے والی سرحدی جھڑپ کے بعد اپنی فوج کو اگلے محاذ پر جنگ کے لیے تیار رہنے کا حکم دیا ہے۔

شمالی کوریا کی سرکاری خبر رساں ایجنسی کے سی این اے کا کہنا ہے کہ کِم جونگ ان نے جمعرات کی رات گئے ایک ہنگامی اجلاس کے بعد ’نیم حالتِ جنگ‘ کا اعلان کیا۔

شمالی کوریا نے جنوبی کوریا کو پیانگ یانگ مخالف پیغامات پر مبنی نشریات بند نہ کرنے کی صورت میں فوجی کارروائی کی دھمکی دی ہے۔

دونوں ممالک کے درمیان کشیدگی میں اضافے کے بعد یہ پہلا موقع نہیں کہ شمالی کوریا کی جانب سے شدید بیان بازی کی گئی ہو۔ ماضی میں اکثر ایسا ہوتا رہا ہے۔

جنوبی کوریا میں موجود بی بی سی کے نامہ نگار سٹیو ایونز کہتے ہیں کہ جب بھی دونوں ملکوں کے درمیان کشیدگی بڑھتی ہے تو جارحانہ لہجہ اپنایا جاتا ہے تاہم اس بار نہ صرف لہجوں میں زیادہ تلخی ہے بلکہ گولہ باری بھی کی گئی ہے۔

کے سی این اے نے اپنی ایک رپورٹ میں بتایا ہے کہ کِم جونگ ان نے اپنی افواج کو جمعے کی شام مقامی وقت کے مطابق پانچ بجے تک ’کسی بھی جنگی کارروائی کے لیے ہر وقت تیار رہنے‘ کا حکم دیا ہے۔ یہ احکامات سینٹرل ملٹری کمیشن کے ہنگامی اجلاس کے بعد جاری کیے گئے ہیں۔

اس سے قبل شمالی کوریا جنوبی کوریا کو دھمکی دے چکا ہے کہ اگر’48 گھنٹوں کے اندر‘ سرحد پار سے نشر ہونے والا پروپیگنڈا بند اور نشریاتی سہولیات ختم نہ کی گئیں تو وہ سخت فوجی کارروائی کا راستہ اپنائے گا۔

خبر رساں ادارے روئٹرز کے مطابق جنوبی کوریا کی یونیفیکیشن کی وزارت نے ایک الگ خط میں کہا ہے کہ پیانگ یانگ مسئلے کو حل کرنا چاہتا ہے تاہم وہ جنوبی کوریا کی جانب سے کیے جانے والی ان نشریات کو اعلان جنگ سمجھتا ہے۔

واضح رہے کہ دونوں مملک کے درمیان کشیدگی میں اُس وقت مزید اضافہ ہوا جب شمالی کوریا نے جمعرات کو سرحد پار بمباری کی۔

اطلاعات کے بعد شمالی کوریا نے یہ بمباری 11 سال بعد شروع ہونے والی پیانگ یانگ مخالف نشریات دوبارہ شروع ہونے کی وجہ سے کی تھی۔

دونوں مملک کے درمیان سنہ 1953-1950 کے درمیان ہونے والی جنگ امن معاہدے کے بجائے عارضی صلح نامے پہ ختم ہوئی تھی جس کے بعد سے شمالی اور جنوبی کوریا تکنیکی اعتبار سے حالت جنگ میں ہیں۔

حالیہ برسوں میں دونوں جانب سے کئی مرتبہ ایک دوسرے پر فائرنگ کی گئی ہے۔