میکسیکو: سمگلروں کی ایک اور سرنگ دریافت
،تصویر کا ذریعہBBC World Service
میکسیکو میں سکیورٹی حکام نے ایک زیرِ زمین سرنگ دریافت کی ہے جو امریکہ منشیات سمگل کرنے کی غرض سے بنائی گئی تھی۔
امریکی سرحد کے قریب واقع شہر تیجوانا ملنے سے والی اس نامکمل سرنگ کے بارے میں خیال کیا جا رہا ہے کہ اس کو سینالاؤ تنظیم نے بنایا تھا جو دنیا بھر میں منشیات سمگل کرتی ہے۔
گذشتہ ماہ میکسیکو کی بدنامِ زمانہ مافیا ڈان اور سینالاؤ تنظیم کے سربراہ جوکوین گزمین، جو اپنے چھوٹے قد کی وجہ سے ’شورٹی‘ کے نام سے مشہور ہیں، جیل سے سرنگ کے ذریعے فرار ہوگئے تھے۔
شورٹی جن کا شمار دنیا کے انتہائی مطلوب منشیات کے سمگلروں میں ہوتا ہے کو تا حال گرفتار نہیں کیا جا سکا۔
حکام کا کہنا ہے کہ تیجوانا سے ملنے والی یہ سرنگ تقریباً 400 فٹ طویل ہے لیکن یہ امریکی سرحد سے تھوڑا پہلے ہی ختم ہو جاتی ہے۔
میکسیکو کی سکیورٹی فورسز نے یہ سرنگ 30 جولائی کو دریافت کی تھی لیکن ذرائع ابلاغ کو اس کے متعلق اتوار کو بتایا گیا۔
حکام کا کہنا ہے کہ انھیں نامعلوم ذرائع سے شہر میں موجود ایک گودام کے بارے میں اطلاع ملی تھی کہ وہاں غیر قانونی سرگرمیاں جاری ہیں اور جب وہاں پر چھاپہ مارا گیا تو یہ نامکمل سرنگ ملی۔
اس سرنگ میں روشنی اور ہوا کا انتظام تھا اور وہاں ریل کی پٹری بھی بچھائی گئی تھی اوراس علاقے میں یہ تیسری سرنگ ہے جو حکام کو ملی ہے۔
End of سب سے زیادہ پڑھی جانے والی
خیال رہے کہ منشیات کا کاروبار کرنے والے امریکہ اور میکسیکو کی سرحد پر سمگلنگ کی غرض سےسرنگیں بنا تے ہیں۔
