’ڈیڈ لائن سے پہلے معاہدہ طے پانے کے امکانات روشن‘

ایران کے جوہری پروگرام پر عبوری سمجھوتے کی ڈیڈ لائن کے خاتمے کے قریب روس کے وزیر خارجہ سرگے لاوروف نے کہا ہے کہ عبوری معاہدہ طے پانے کے امکانات ’بہت زیادہ‘ ہیں۔

اس عبوری معاہدے کے لیے دی گئی حتمی مدت منگل کی شب ختم ہو جائے گی اور مذاکرات کاروں نے پیر کو رات گئے تک بات چیت کے بعد منگل کی صبح دوبارہ مذاکرات شروع کیے ہیں۔

امریکہ، برطانیہ، چین، روس، فرانس اور جرمنی کے مندوبین تقریباً ایک ہفتے سے ایرانی حکام سے بات چیت میں مصروف ہیں تاکہ 18 ماہ سے جاری ان جوہری مذاکرات کو کامیاب بنایا جا سکے۔

معاہدے کے ڈیڈ لائن قریب آنے کے ساتھ ساتھ سوئٹزرلینڈ کے شہر لوزین میں جاری مذاکرات میں بھی تیزی آگئی ہے۔

منگل کو پریس کانفرنس سے خطاب میں روسی وزیر خارجہ نے کہا کہ ’میرے خیال میں معاہدہ طے پانے کے بہت روشن امکانات ہیں۔‘

روسی وزیر خارجہ پیر کو یہ کہتے ہوئے مذاکرات سے الگ ہوئے تھے کہ وہ تبھی واپس آئیں گے جب انھیں کسی معاہدے کے حقیقی امکانات پیدا ہوتے دکھائی دیں گے۔

دوبارہ مذاکرات کے اس فیصلہ کن دور میں دوبارہ شامل ہونے والے روسی وزیر خارجہ نے توقع ظاہر کی ہے کہ فریقین معاہدے کے قریب پہنچ گئے ہیں۔

مذاکرات کاروں کی کوشش ہے کہ منگل کی رات تک وہ معاہدے کے ڈھانچے پر متفق ہو جائیں جس کی بنیاد پر تکنیکی تفصیلات کے حوالے سے ایک وسیع البنیاد معاہدہ طے پا سکے جس کے لیے 30 جون کی حتمی تاریخ مقرر کی گئی ہے۔

امریکی وزیرِ خارجہ جان کیری نے پیر کی شب سی این این سے بات کرتے ہوئے کہا ہے کہ ’ہم رات گئے تک اور پھر کل کام جاری رکھیں گے۔ اب بھی کچھ مشکل معاملات باقی ہیں۔ ہم انھیں حل کرنے کے لیے سخت محنت کر رہے ہیں اور ہر کوئی کل کی اہمیت جانتا ہے۔‘

ایرانی مذاکراتی ٹیم کے رکن اور ملک کے نائب وزیرِ خارجہ عباس عراقچی نے بھی پیر کی شب مذاکرات کے اختتام پر کہا کہ ’ہم فی الوقت اس مقام پر نہیں کہ کہہ سکیں کہ ہم معاملات کے حل کے قریب ہیں لیکن ہم پرامید ہیں اور اپنی کوششیں جاری رکھیں گے۔‘

ایران کے سرکاری ٹی وی سے بات کرتے ہوئے ان کا یہ بھی کہنا تھا’ذاتی طور پر میرے خیال میں یہ بھی ممکن ہے کہ ہم کل کسی معاہدے تک پہنچ جائیں یا یہ فیصلہ کر لیں کہ معاہدہ کرنا ممکن نہیں اور بات چیت کا رخ بدل جائے۔ جو بھی ہو ہم پرامید ہیں کہ کل یا پھر پرسوں یہ طے ہو جائے گا۔‘

مذاکرات سے وابستہ ایک مغربی سفارت کار نے خبر رساں ادارے روئٹرز کو بتایا کہ ’ہمیں لگ رہا ہے کہ وقت آ چکا ہے کہ معاہدہ ہو یا پھر نہیں۔ کیونکہ اگر ہم ابھی کسی قسم کے عبوری معاہدے پر متفق نہیں ہوتے تو اس چیز کی وضاحت کرنا بہت مشکل ہوگی کہ 30 جون تک ایسا کیسے ممکن ہو سکے گا۔‘

ایران اور چھ عالمی طاقتیں نومبر 2013 میں ایک عبوری معاہدے پر اتفاق کے بعد طویل المدتی معاہدے کی حتمی مدت میں دو مرتبہ اضافہ کر چکی ہیں۔

اب فریقین نے 31 مارچ تک جامع معاہدے کے خدوخال پر اتفاق اور 30 جون تک تکینکی تفاصیل کے ساتھ جامع معاہدے کی منظوری کی ڈیڈ لائنز مقرر کی ہوئی ہیں۔

امریکی کانگریس نے پہلے ہی متنبہ کر دیا ہے کہ اگر 31 مارچ تک اس سلسلے میں اتفاقِ رائے نہ ہوا تو وہ ایران پر مزید پابندیاں عائد کرے گی تاہم امریکی صدر براک اوباما پہلے ہی ان پابندیوں کو ویٹو کرنے کا اعلان کر چکے ہیں۔

خبر رساں ادارے روئٹرز کے مطابق مستقبل میں ایران کی یورینیئم کی افزودگی پر تحقیق و ترقی اور اقتصادی پابندیاں اٹھائے جانے کی رفتار وہ معاملات ہیں جن پر اتفاقِ رائے نہیں ہو پا رہا۔

جرمنی کے وزیرِ خارجہ فرینک والٹر سٹینمیئر نے بھی کہا ہے کہ مذاکرات کے کامیاب ہونے کی راہ میں ایک اہم رکاوٹ ایران کی جوہری تحقیق اور ترقی کا معاملہ ہے۔

کون کیا چاہتا ہے؟

لوزین میں موجود بی بی سی نامہ نگار باربرا پلِیٹ کے مطابق ایران کے جوہری پروگرام پر کم ازکم ایک دہائی یعنی دس سال کی پابندی عائد کی جائے گی جس میں سخت معائنہ کاری بھی شامل ہے۔

ان کا کہنا ہے کہ اگرچہ ان مذاکرات میں پیش رفت ہوئی ہے تاہم اب بھی اس پر باہمی اتفاق نہیں ہو سکا کہ ایران کو کتنے عرصے تک اپنا پروگرام محدود رکھنا ہوگا اور اس پر عائد پابندیوں سے اسے کتنے عرصے میں چھٹکارا مل سکے گا۔

عالمی طاقتیں ایران سے مطالبہ کر رہی ہیں کہ وہ اپنی سینٹری فیوجز مشینوں میں دو تہائی کمی کرے اور جوہری مواد کے ذخیرے کو روس کے حوالے کر دے۔