مگرمچھ اور سانپ کی لڑائی میں کون جیتا؟

آسٹریلیا کی ریاست کوینزلینڈ میں ایک سانپ اور مگرمچھ کی لمبی لڑائی ہوئی جس کے بعد سانپ نے مگرمچھ کو لپیٹ کر مار ڈالا اور پھر اسے نگل گیا۔

یہ واقعہ ماؤنٹ اسا کی جھیل مونڈارا میں پیش آیا۔ ایک مقامی رہائشی نے اس پورے واقعے کو کیمرے میں محفوظ کر لیا۔

دس فٹ لمبا سانپ مگرمچھ کے گرد لپٹ گیا اور دونوں کی لڑائی پانچ گھنٹے تک گتھم گتھا رہے۔ لڑائی خاصی دیر تک پانی میں ہوتی رہی، آخرکار سانپ مرا ہوا مگرمچھ خشکی پر لایا اور نگل گیا۔

مقامی رہائشی ٹفنی کورلس نے پوری لڑائی دیکھی اور تصاویر لیں۔ انھوں نے بی بی سی کو بتایا: ’یہ لڑائی بہت دلچسپ تھی۔ سانپ نے اپنے آپ کو مگر مچھ کے گرد لپیٹا اور اور مگرمچھ کی ٹانگوں کو مضبوطی سے جکڑ لیا۔‘

انھوں نے کہا کہ ’مگرمچھ کے مرنے کے بعد سانپ کے اپنے آپ کو اس کے بدن سے کھولا اور پھر اسے منھ کی طرف سے نگلنا شروع کر دیا۔‘

ایک اور عینی شاہد ایلس روزنتھال نے مقامی میڈیا کو بتایا کہ دونوں جانوروں میں پانچ گھنٹے گھمسان کی جنگ ہوتی رہی۔ انھوں نے کہا کہ آخر میں دونوں تھک کر چور ہو گئے تھے۔

انھوں نے کہا: ’یہ ایسی چیز نہیں ہے جو روز روز دیکھنے کو ملے۔‘

پائتھن نامی اژدہے اپنے شکار کے جسم کے گرد لپٹ جاتے ہیں اور اسے جکڑ کر اس کا سانس بند کر دیتے ہیں۔ اکثر سانپوں کے جبڑے لچک دار ہوتے ہیں جس کے باعث وہ اپنے جسم کے برابر شکار نگل سکتے ہیں۔