تیل کی برآمد پر یورپی یونین کی پابندیاں ’ناجائز‘ ہیں: ایران

ایران نے کہا کہ یورپی یونین کی طرف سے ایران سے تیل خریدنے پر مکمل پابندی عائد کرنے کا فیصلہ ’ناجائز‘ ہے اور یہ ’ناکام ثابت ہوگا‘۔

وزارتِ خارجہ کے ترجمان رامن مہمانپرست نے کہا کہ یہ اقدام ایران کو اس کے بنیادی حق کے حصول سے نہیں روک سکےگا۔

یہ پابندیاں ایران کے ساتھ تیل برآمد کرنے کے نئے معاہدوں کو ختم کرتی ہیں اور یورپی یونین میں ایران کے سینٹرل بینک کے اثاثے منجمد کرتی ہیں۔

آج کل یورپی یونین ایران کی برآمد کردہ تیل میں سے تقریباً بیس فیصد تیل خریدتی ہے۔

ان پابندیوں کے تحت ایران سے تیل برآمد کے تمام نئے معاہدے ختم کر دیے جائیں گے جبکہ موجودہ معاہدے کا احترام صرف رواں سال یکم جولائی تک کیا جائے گا۔

یورپی یونین نے ایران پر پابندیاں اس کے جوہری پروگرام کے باعث عائد کی ہیں۔ دوسری جانب ایران نے جوہری ہتھیار تیار کرنے کی تردید کرتے ہوئے کہا ہے کہ اس مسئلے کا حل پابندیاں نہیں بلکہ مذاکرات ہیں۔

وزارتِ خارجہ کے ترجمان نے کہا کہ ’یورپی یونین کے اہلکار اور وہ دوسرے ممالک جو امریکہ کے سیاسی دباؤ میں ہیں ۔۔۔ اپنے قومی مفاد سامنے رکھیں اور امریکی حکام کے خفیہ ارادوں کی تکمیل میں مدد دینے کے لیے اپنے آپ کو ایران کے تیل سے محروم نہ کریں۔‘

واضح رہے کہ رواں سال کے شروع میں اقوامِ متحدہ نے تصدیق کی تھی کہ ایران نے اپنے زیرِ زمین پلانٹ میں یورینیم کی بیس فیصد افزودگی شروع کردی ہے۔

فی الوقت ایران کی تیل برآمدات میں بیس فیصد حصہ یورپی یونین کا ہے۔

خبر رساں ادارے رائٹرز کے مطابق یورپی یونین ایران کے خلاف یہ پابندی رواں ہفتے سے ہی لاگو کر سکتی ہے۔

اس سے قبل یورپی یونین کی خارجہ پالیسی کی سربراہ کیتھرین ایشٹن نے کہا تھا کہ پابندیوں کا مقصد ایران کو اس مسئلے کے بارے میں بات چیت کرنے پر رازی کرنا ہے۔

ایران میں بی بی سی کے نامہ نگار جیمز رینلڈز کے مطابق ایران کا سب سے قیمتی اثاثہ تیل ہے جس کی فروخت کے ذریعے ایرانی حکومت کے اخراجات پورے ہو رہے ہیں۔ یورپی یونین کے اس فیصلے سے ایرانی معیشت کو نقصان تو پہنچے گا لیکن برباد نہیں ہوگی۔

ایران زیادہ تر تیل ایشیائی ممالک کو بیچتا ہے لیکن امریکہ اور یورپی یونین اب یہ کوشش کر رہے ہیں کہ یہ ممالک ایران سے تیل خریدنا کم کر دیں۔

واضح رہے کہ یورپی یونین کا یہ فیصلہ اگرچہ ابھی تک نافذ نہیں ہوا لیکن تیل کی قیمتیں ابھی سے جاری تناؤ کی وجہ سے بڑھ گئی ہیں۔