طالب علم کی جگہ خود امتحان دینے پر استاد گرفتار
افریقی ملک برونڈی میں ایک ہیڈ ماسٹر کو ہی طالب علم کی جگہ امتحان دیتے ہوئے پکڑا گیا ہے۔ استاد طالبِ علم کا روپ دھارے کمرۂ امتحان میں موجود تھے۔
ہوا کچھ یوں کہ پولیس نے خفیہ اطلاع پر کمرہ امتحان پر چھاپہ مارا تو وہاں ہیڈ ماسٹر بیٹھے امتحان دے رہے تھے۔
اُن کا پتہ لگانے کے لیے سادہ کپڑوں میں اہلکار رات سے سکول میں موجود تھے لیکن جب کمرہ امتحان میں انھیں رنگے ہاتھوں پکڑا گیا تو ٹیکنیکل کالج کے ہیڈ نے کسی دوسرے کی جگہ پرچے دینے کے الزام کو مسترد کیا۔
اس بارے میں جاننے کے لیے مزید پڑھیے
بنیامین منارمبونا نے بتایا کہ وہ صومالیہ میں تعینات امن فورس کے ایک اہلکار کی جگہ الیکٹرونکس کا پرچہ دے رہے تھے۔
انھوں نے کہا کہ طالب علم یونیورسٹی سے فارغ التحصیل ہونا چاہتا ہے۔
End of سب سے زیادہ پڑھی جانے والی
ہیڈ ماسٹر نے بتایا کہ امن فورس کے سپاہی نے برونڈی واپس آنے پر انھیں پرچہ دینے کے عوض رقم دینے کا وعدہ کیا ہے۔
برونڈی کی وزیر تعلیم بھی کمرہ امتحان چھاپہ مارنے والی ٹیم کے ساتھ تھیں۔
وزیر تعلیم نے کہا کہ 'آپ جو بتا رہے ہیں وہ سچ نہیں ہے۔'
انھوں نے کہا کہ 'ہم آپ کی تفتیش کریں گے کیونکہ ہماری اطلاعات کے مطابق آپ نے پہلی مرتبہ یہ نہیں کیا ہے۔'
وزیر تعلیم کے ساتھ ساتھ صحافی بھی موجود تھے۔
ہیڈ ماسٹر کو تین دوسرے طلبہ کے ساتھ حراست میں لیا گیا، اُن پر امتحان میں نقل کرنے کا الزام ہے۔
ہیڈ ماسٹر بنیامین اس وقت پولیس کی حراست میں ہیں۔
برونڈی میں اہم امتحانات کے دورانِ امتحانی مراکز دوسری سکولوں میں بنتے ہیں۔ یہی وجہ ہے کہ کمرہ امتحان میں ہیڈ ماسٹر بنیامین کو کوئی پہچان نہیں سکا۔
