’مقدس زمین‘: ارجنٹینا میں دنیا کا پہلا مذہبی تھیم پارک

بیونس آئرس کے مرکز میں ایک تھیم پارک ہے جس کا نام ٹائیرا ساتتا (مقدس زمین) ہے اور اس کے بارے میں کہا جاتا ہے کہ یہ دنیا کا پہلا مذہبی تھیم پارک ہے۔

ٹائیرا سانتا کو حضرت عیسیٰ کے زمانے کے یروشلم کی گلیوں جیسا بنانے کی کوشش کی گئی ہے۔

یہاں سیر کے لیے آنے والے افراد تنگ گلیوں میں سے گزرتے ہیں جو کہ پلاسٹک سے بنے کھجور کے درختوں، مجسموں سے بھری ہیں۔

ان گلیوں میں مجسمے اوراداکار حضرت عیسیٰ کی زندگی کے بعض لمحات دوبارہ پیش کرنے کی کوشش کرتے دکھائی دیتے ہیں۔

اس پارک کے داخلی دروازے پر خاندانوں، سیاحوں اور نوجوان جوڑوں کی لمبی قطاریں دکھائی دیتی ہیں۔

زیادہ تر لوگ تو ارجنٹینا کے مختلف علاقوں سے ہی آتے ہیں لیکن ان میں غیرملکیوں کی بھی بڑی تعداد موجود ہوتی ہے۔

بعض آنے والوں کے لیے تو یہ پارک تقریباً زیارت کرنے کے مقام کا درجہ رکھتا ہے۔ کیونکہ یہاں آپ کو مذہبی اور فن کا امتزاج ملتا ہے۔

جو چیز سب سے زیادہ توجہ کا مرکز بنتی ہے وہ اس پارک میں لگایا جانے والا حضرت عیسی کا میکینیکل مجسمہ ہے۔ اس کی بلندی 60 فٹ ہے اور وہ ایک گھنٹے کے لیے مصنوعی پہاڑی پر نمودار ہوتا ہے۔

جب یہ دیو قامت مجسمہ پوری طرح بلند ہو جاتا ہے تو وہ مڑتا ہے، آنکھیں بند کرنے کے بعد اپنی ہتھیلیوں کو گھماتا ہے جس سے پہاڑی کے نیچے کھڑے لوگ جذباتی ہو جاتے ہیں۔

پارک میں کام کرنے والے تمام کارکن حضرت عیسی کے دور میں پہنے جانے والے لباس پہنے دکھائی دیتے ہیں۔

سیر کے لیے آنے والے افراد قدیم رومی دور کے لباس میں ملبوس سکیورٹی گارڈز کے ساتھ تصاویر بھی بنوا سکتے ہیں اور مشرق وسطی کی طرز پر بنائے گیے کیفے سے چھوٹا روغنی پراٹھا بھی خرید سکتے ہیں۔

صرف ایک ایسی چیز ہے جو آپ کو یہ یاد دلاتی ہے کہ آپ زمانہ قدیم میں نہیں بلکہ جدید دور میں ہیں اور وہ ہے پارک کے بالکل قریب واقع نیو بیری ایئرپورٹ جہاں سے ہر چند منٹ بعد ایک طیارہ اڑ کر پلاسٹک سے بنے کھجور کے درختوں کے اوپر سے گزر کر جاتا ہے۔

تمام تصاویر بشکریہ ایریکا کینیپا۔