ہیڈن اپنے آخری پانچ ٹیسٹ میچوں میں صرف 149 رن بنا پائے ہیں

ہیڈن کوگزشتہ برس نیوزی لینڈ اور حال ہی میں جنوبی افریقہ کے خلاف ٹیسٹ سیریز میں خراب کارکردگی کے بعد ایک روزہ اور ٹوئنٹی ٹوئنٹی میچوں کے لیے آسٹریلوی ٹیم میں شامل نہیں کیا گیا تھا۔

میتھیو ہیڈن نے ایک روزہ اور ٹوئنٹی ٹوئنٹی میچوں کے لیے آسٹریلوی ٹیم میں شامل نہ کیے جانے پر ریٹائرمنٹ لینے کا اشارہ دیا تھا۔ ریٹائرمنٹ کا اعلان کرتے ہوئے ان کا کہنا تھا کہ ’میں نے کرکٹ کھیل کر ہمیشہ لطف اٹھایا ہے اور میں اپنے ملک کی نمائندگی کرنے کو کسی اعزاز سے کم نہیں سمجھتا‘۔

سترہ برس پر محیط اور ایک سو تین ٹیسٹ میچوں پر مشتمل کیرئر میں پچاس کی اوسط سے آٹھ ہزار چھ سو پچیس رن بنانے والے میتھیو ہیڈن اپنے آخری پانچ ٹیسٹ میچوں میں صرف سولہ کی اوسط سے 149 رن بنا پائے تھے۔

ایک روزہ کرکٹ میں ہیڈن دو مرتبہ عالمی کرکٹ کپ جیتنے والی آسٹریلوی ٹیم کے رکن رہ چکے ہیں اور انہوں نے ایک سو اکسٹھ ایک روزہ میچوں میں دس سنچریاں اور چھتیس نصف سنچریاں بھی بنائی ہیں۔ اس طرز کی کرکٹ میں ان کی کیرئر اوسط چوالیس کے قریب رہی جبکہ ان کا زیادہ سے زیادہ سکور 181 رنز تھا۔