عبدالرشید شکور بی بی سی اردو ڈاٹ کام کراچی

	اٹھارہ سے اٹھائیس جنوری کے درمیان ہونے والے تینوں ایک روزہ میچ ڈے اینڈ نائٹ ہوں گے

تین میچوں کی سیریز کا پہلا میچ اکیس جنوری کو کراچی میں کھیلا جائے گا۔

ٹیم میں واحد نیا چہرہ انیس سالہ لیفٹ ہینڈڈ بیٹسمین عمر امین کا ہے جوایک سال کے دوران انڈر 19 اور فرسٹ کلاس کرکٹ کی عمدہ کارکردگی پر سلیکٹرز کا اعتماد حاصل کرنے میں کامیاب ہوگئے ہیں۔

عمر امین نے پاکستانی انڈر 19 کی نمائندگی کرتے ہوئے انگلینڈ اور بنگلہ دیش کی ٹیموں کے خلاف سنچریاں بنائیں اس کے علاوہ وہ پنڈی کی طرف سے کھیلتے ہوئے اس سیزن کے پنٹنگولر کپ میں ایک سنچری اور دو نصف سنچریاں بھی سکور کر چکے ہیں۔

آل راؤنڈر فواد عالم جو ون ڈے اور ٹوئنٹی ٹوئنٹی میں اچھی کارکردگی دکھاتے آ رہے تھے حتمی ٹیم میں جگہ نہیں بناسکے ہیں اور ان پر ریگولر آف اسپنر سعید اجمل کو ترجیح دی گئی ہے۔

آٹھ ون ڈے انٹرنیشنل کھیلنے والے یاسر عرفات کی بھی ٹیم میں واپسی ہوئی ہے وہ آخری بار گزشتہ سال جنوری میں زمبابوے کے خلاف ملتان میں ون ڈے کھیلے تھے۔سلیکٹرز نے سلمان بٹ کے اوپننگ پارٹنر کے طور پر خرم منظور کو ناصر جمشید پر ترجیح دی ہے۔

اس کے علاوہ ٹیم میں چھ تیز بولرز بھی شامل کیے گئے ہیں۔

ٹیم ان کھلاڑیوں پر مشتمل ہے: شعیب ملک ( کپتان ) سلمان بٹ، خرم منظور، یونس خان، مصباح الحق، شاہد آفریدی، شعیب اختر، سہیل تنویر، عمرگل، سعید اجمل، راؤ افتحار، عمرامین، یاسرعرفات، کامران اکمل اور سہیل خان۔