انگلینڈ کی ٹیم انڈیا میں دو ٹیسٹ میچ کھیلے گی

ممبئی پر حملوں کے بعد انگلینڈ نے بھارت کا دورہ ادھورا چھوڑ دیا تھا اور ٹیم انگلینڈ واپس آگئی تھی جبکہ بھارت اور انگلینڈ کے درمیان سات میں سے دو ایک روزہ میچ بھی منسوخ کر دیئے گئے تھے۔

پہلا ٹیسٹ میچ گیارہ دسمبر جمعرات سے کھیلا جائے گا۔

پیر کی شام جب ٹیم چنئی ہوائی اڈے پہنچی توحفاظتی انتظامات پر پانچ ہزار پولیس اہلکار مامور تھے۔

سینکڑوں کی تعداد میں شائقین کھلاڑیوں کی ایک جھلک دیکھنے ائر پورٹ پر موجود تھے۔ لیکن بڑی تعداد میں موجود کمانڈوز نےانہیں کھلاڑیوں سے دور ہی رکھا۔

چنئی کے جوائنٹ پولیس کمشنر کے مطابق ٹیم جس ہوٹل میں ٹھہری ہے اس کے اندر تین سو کمانڈو تعینات کیے گئے ہیں اور ہوٹل کے بارے ایک ہزار پولیس اہلکار موجود رہیں گے۔

انگلینڈ نے رائن سائیڈ باٹم کی جگہ کینٹ کاوٴنٹی کےتیز رفتار گیند باز امجد خان کو ٹیم میں شامل کیا ہے جو اپنے بین الاقوامی کریر کا آغاز کر رہے ہیں۔