میتھیو ہیڈن نے عمدہ کھیلتے ہوئے 83 رنز بنائے

جب دوسرے روز کا کھیل ختم ہوا تو آسٹریلیا کی اوپننگ جوڑی ہیڈن اور کاٹیچ بیٹنگ کر رہی تھی اور ٹیم کا سکور بغیر کسی نقصان کے پچاس رنز تھا۔ ان دونوں نے تیسرے روز اچھی بیٹنگ کرتے ہوئے پہلی وکٹ کی شراکت میں 123 رنز بنائے۔ ہیڈن 83 رنز بنا کر اور سائمن کیٹچ 64 رنز بنا کر آؤٹ ہوئے۔

ان کے علاوہ کپتان رکی پونٹنگ نے 87 اور مائیک ہسی نے 53 رنز بنائے اور جب کھیل ختم ہوا تو انڈیا کی لیڈ صرف 275 رنز ہی رہ گئی تھی۔ تاہم ابھی بھی آسٹرییا کو فالو آن سے بچنے کے لیے 75 رنز کی ضرورت تھی۔

اس سے قبل میچ کے دوسرے دن انڈیا کے گوتم گھمبیر اور وی وی ایس لکشمن نے ڈبل سنچریاں بنائی تھیں۔

یہ پہلا موقع تھا کہ انڈیا کے دو بیٹسمینوں نے ٹیسٹ میچ کی ایک ہی اننگز میں ڈبل سینچریاں بنائی ہوں اور یہ بھی پہلی بار ہی ہوا ہے کہ ایسا آسٹریلیا کی ٹیم کے خلاف ہوا ہو۔

گوتم گمبھیر نے جمعرات کے روز کھیل کے پہلے سیشن میں ہی اپنی ڈبل سینچری مکمل کی۔ وہ دو سو چھ رنز بنا کر شین واٹسن کی گیند پر کلین بولڈ ہوئے۔

ان کے آؤٹ ہونے کے بعد سورو گنگولی بیٹنگ کرنے کے لیے میدان میں اترے۔ تاہم وہ زیادہ دیر تک وکٹ پر نہ ٹھہر سکے اور صرف پانچ رنز بنا کر کاٹیچ کی گیند پر پونٹنگ کے ہاتھوں کیچ ہو گئے۔

دوسری طرف وی وی ایس لکشمن نے اپنا شاندار کھیل جاری رکھا اور ڈبل سینچری بنا ڈالی۔

جیسے ہی وی وی ایس لکشمن کی ڈبل سینچری مکمل ہوئے، انڈیا کے کپتان انیل کمبلے نے اننگز ختم کرنے کا اعلان کر دیا۔ اس وقت انڈیا کا سکور چھ سو تیرہ تھا اور اس کے سات کھلاڑی آؤٹ ہوئے تھے۔

یاد رہے کہ انڈیا کی ٹیم کو سیریز میں ایک صفر کی برتری حاصل ہے۔

دریں اثناء بھارت کے اوپننگ بلے بازگوتم گمبھیر کو آسٹریلوی آل راؤنڈر شین واٹسن کو کہنی مارنے کا خطا وار پایا گیا ہے جس کے لیے ان پر ایک ٹیسٹ میچ کھیلنے کی پابندی عائد کر دی گئی ہے۔

ستائس سالہ گمبھیر پر الزام تھا کہ انہوں نے ٹیسٹ میچ کے دوران آسٹریلوی کھلاڑی واٹسن کے ساتھ غلط سلوک کیا ہے۔ آئی سی سی نے شین واٹسن پر بھی ’کھیل کی روح کے خلاف طرز عمل اختیار کرنے‘ کے الزام میں میچ فیس کے دس فیصد کے برابر جرمانہ عائد کیا ہے۔