عبدالرشید شکور بی بی سی اردو ڈاٹ کام، کراچی

	تبارک ڈار میچ کے دوران عمر گل کا باؤنس لگنے سے زخمی ہوگئے تھے

پاکستان کے خلاف میچ کے بعد میڈیا سے بات کرتے ہوئے تبارک ڈار نے کہا کہ ان کی ٹیم میچ کے کچھ حصوں میں اچھا کھیلی لیکن ون ڈے میچ جیتنے کے لیے کارکردگی ہر سیشن میں اچھی ہونی چاہیے۔

انہوں نے کہا کہ ’پاکستان کی سات وکٹیں صرف ایک سو اکسٹھ پر حاصل کرنے سے وہ زبردست دباؤ قائم کرنے میں کامیاب ہوگئے تھے اور پاکستانی ٹیم بیک فٹ پر آگئی تھی اگر وہ سنچری پارٹنرشپ نہ ہوتی اور اس وقت انہیں وکٹ مل جاتی تو صرف بولرز ہی بچے تھے‘۔

ہانگ کانگ کے کپتان نے لیفٹ آرم سلو بولر ندیم احمد کی تعریف کی۔ جب ان سے پوچھا گیا کہ آپ نے انہیں سات اوورز کے بعد بولنگ سے کیوں ہٹادیا جبکہ وہ چار وکٹیں حاصل کرتے ہوئے پاکستانی ٹیم پر دباؤ ڈالے ہوئے تھے؟ تو انہوں نے کہا کہ پچاس اوورز کے میچ میں دوسرے بولرز نے بھی بولنگ کرنی تھی لہذا ان کی جگہ وہ کسی دوسرے کو بولنگ کے لیے لے آئے تھے۔

تبارک ڈار تسلیم کرتے ہیں کہ میچ فٹنس کا مسئلہ ان کی ٹیم کے ساتھ درپیش ہے۔
انہوں نے کہا کہ ہانگ کانگ میں رہ کر کرکٹ کھیلنے کا مطلب اس کھیل سے محبت ہے۔ ہانگ کانگ کی ٹیم میں زیادہ تر پاکستان میں پیدا ہونے والے کرکٹرز ہیں اور اس ٹیم میں اکثریت ایسے کرکٹرز کی ہے جو نوجوان ہیں اور طالبعلم ہیں۔ تبارککے مطابق’ بین الاقوامی کرکٹ میں تجربہ بڑی اہمیت رکھتا ہے انہیں جتنے میچز ملیں گے ان کی کارکردگی میں بہتری آئے گی‘۔

ہانگ کانگ کی ٹیم اب بدھ کو بھارت کی مضبوط ٹیم کے مقابل ہوگی۔ تبارک ڈار کہتے ہیں کہ پاکستان کے مقابلے میں بھارتی ٹیم موجودہ کارکردگی کے لحاظ سے مضبوط ہے لیکن اس کا مطلب یہ نہیں کہ وہ اس کے لیے آسان حریف بنیں گے ان کی کوشش ہوگی کہ ایک اور اچھی کارکردگی دکھائیں۔

پاکستانی کپتان شعیب ملک یہ ماننے کے لئے تیار نہیں کہ ہانگ کانگ کے خلاف ان کی ٹیم کی کارکردگی بہت خراب رہی۔ انہوں نے کہا کہ کرکٹ میں ہر ٹیم مشکل سے دوچار ہوتی ہے لیکن وہ سات وکٹیں گرنے کے باوجود پریشان نہیں تھے اور انہیں یقین تھا کہ اگر ان کی ٹیم دو سو سے کچھ زیادہ رنز بھی بنالیتی ہے تو ان کے بولرز انہیں میچ جتواسکتے ہیں۔

شعیب ملک نے کہا کہ ٹاپ آرڈر بیٹنگ کی ناکامی سے لوئر آرڈر بیٹنگ کو صلاحیتیں دکھانے کا موقع ملا اور انہیں خوشی ہے کہ فواد عالم اور سہیل تنویر نے عمدہ بیٹنگ کی۔ شعیب نے مصباح الحق کی کارکردگی پر اعتراض کو مسترد کردیا اور کہا کہ’نچلے اوورز میں انہیں جتنا بھی موقع ملا ہے وہ سکور کر رہے ہیں‘۔