مناء رانا بی بی سی اردو ڈاٹ کام، لاہور

	یہ محمد اشرفل کے ون ڈے کیرئر کی دوسری سنچری تھی

بنگلہ دیش کی ٹیم نے یو اے ای کو جیتنے کے لیے 301 رنز کا ہدف دیا تھا لیکن یو اے ای کی پوری ٹیم چھیالیسویں اوور میں 204 رنز بنا کر آؤٹ ہوگئی۔

بنگلہ دیش نے ٹاس جیت کر پہلے بیٹنگ کا فیصلہ کیا اور مقررہ پچاس اوورز میں آٹھ وکٹوں کے نقصان پر 300 رنز بنائے جن میں کپتان محمد اشرفل کے آٹھ چوکوں کی مدد سے بنائِے گئے ناقابل شکست ایک سو نو رنز شامل تھے۔

اپنی اسی کارکردگی کی بناء پر محمد اشرفل مین آف دی میچ بھی قرار پائے۔یہ محمد اشرفل کے کیرئر کا سب سے بڑا سکور ہے۔ اس سے پہلے محمد اشرفل نے آسٹریلیا کے خلاف سو رنز بنائے تھے۔

محمد اشرفل کے علاوہ بنگلہ دیش کی جانب سے رقیب الحسن نو چوکوں کی مدد سے 83 رنز بنا کر نمایاں رہے۔ متحدہ عرب امارات کی جانب سے زاہد شاہ نے تین جبکہ خرم خان نے دو کھلاڑیوں کو آؤٹ کیا۔ بنگلہ دیش کے تین کھلاری رن آؤٹ ہوئے۔

جواب میں یو اے ای کی جانب سے آل راؤنڈر خرم خان نے سب سے زیادہ اٹھہتر رنز بنائے جبکہ اوپنر ارشد علی نے اکتالیس رنز کی اننگز کھیلی۔ ان دونوں کے علاوہ یو اے ای کا کوئی بیٹسمین قابل ذکر سکور نہ بنا سکا۔

بنگلہ دیش کی جانب سے عبدالرزاق نے تین، محمود اللہ اور الوک کپالی نے دو، دو کھلاڑیوں کو آؤٹ کیا جبکہ مشرفی مرتضی،شہادت حسین اور دلار محمد نے ایک ایک وکٹ حاصل کی۔

اس کامیابی کے بعد بنگلہ دیش کے ایشیا کپ کے دوسرے راؤنڈ میں پہنچنے کے امکانات روشن ہوگئے ہیں۔ میچ کے بعد بنگلہ دیش کے کپتان محمد اشرفل نے کہا کہ اب ان کی نظر کل کے میچ پر ہے کیونکہ ان کے سامنے کل سری لنکا جیسی مضبوط ٹیم ہے۔