مجھے یقین ہے کہ ہم جیت جائیں گے: کوچ

انٹرنیشنل کرکٹ کونسل کی ورلڈ لیگ ڈویژن فائیو ٹورنامنٹ میں افغانستان کی کرکٹ ٹیم کا پہلا میچ جاپان کے خلاف ہے۔

افغانستان کی ٹیم کے کوچ تاج ملک نے بی بی سی ریڈیو جرسی سے بات کرتے ہوئے کہا ’افغانستان میں ہم کرکٹ کو بڑی سنجیدگی سے لیتے ہیں۔ ہم بڑے جوش اور جذبے سے کھیلتے ہیں۔‘

افغانیوں نے یہ کھیل انیس سو اسی کی دہائی میں پاکستان میں سیکھا۔

ہم جیتیں گے  اگر ہمارا مقابلہ امریکہ سے ہوتا ہے تو میرے خیال میں ساری دنیا یہ میچ دیکھے گی۔ لوگ اس میچ کو سیاسی پہلو سے دیکھیں گے۔ ہمیں بہت خوشی ہو گی اگر ہم امریکہ سے جیت جاتے ہیں اور مجھے یقین ہے کہ ہم جیت جائیں گے۔ افغان کوچ

اگر افغان کرکٹ ٹیم نے اچھا کھیل دکھایا تو ان کا سیمی فائنل یا فائنل میں مقابلہ امریکہ سے ہو سکتا ہے۔

تاج نے کہا ’اگر ہمارا مقابلہ امریکہ سے ہوتا ہے تو میرے خیال میں ساری دنیا یہ میچ دیکھے گی۔ لوگ اس میچ کو سیاسی پہلو سے دیکھیں گے۔ ہمیں بہت خوشی ہو گی اگر ہم امریکہ سے جیت جاتے ہیں اور مجھے یقین ہے کہ ہم جیت جائیں گے۔‘

اس نامعلوم ٹورنامنٹ کو شہرت افغان ٹیم کی وجہ سے ملی ہے۔

آئی سی سی کے اینڈریو فیچنی کا کہنا ہے ’افغان ٹیم کی وجہ سے اس ٹورنامنٹ کو بہت توجہ مل رہی ہے۔‘

	حامد حسن پہلے افغان کرکٹر تھے جو ایم ایم سی کی طرف سے لارڈز کے میدان میں کھیلے تھے

سابق ٹائمز اخبار کے صحافی ٹم ایلبون کا کہنا ہے ’یہ پہلا عالمی کرکٹ ٹورنامنٹ ہے جس میں افغان ٹیم حصہ لے رہی ہے اور جس میں جیتنے کی امید بھی ہے۔‘

ٹم افغان ٹیم پر دستاویزی فلم بنا رہے ہیں۔

ٹم کا کہنا ہے ’افغانستان کی فٹبال ٹیم بہت کمزور ہے۔ اس کے علاوہ پانچ کھلاڑی اولمپک میں حصہ لے رہے ہیں اور ان میں سے ایک کے جیتنے کی امید ہے۔ تاہم تمام افغان کرکٹ سے امید لگائے بیٹھے ہیں۔‘

افغانستان کی کرکٹ ٹیم میں اچھے بیٹسمین اور بالر ہیں۔ ان میں سے ایک حامد ہے جو کہ نوے میل فی گھنٹے کی رفتار سے گیند کراتا ہے۔

ایلبون نے کہا کہ ان کے پاس سپنرز نہیں ہیں تاہم وہ اپنے تیز بالنگ پرانحصار کر رہے ہیں۔

دوسری طرف تاج کے لیے یہ موقع ہے کہ اپنے ملک کو جنگ کی تباہ کاریوں کے علاوہ بھی پیش کر سکیں۔