مناء رانا بی بی سی اردو ڈاٹ کام، لاہور

	یونس خان میچ کھیلنے تو آگئے لیکن صرف ایک رن بنا کر آؤٹ ہو گئے

ایلن پی کوک جو کہ شعیب اختر کے میچ فکسنگ کے متنازع بیان کی تحقیقات کرنے کے علاوہ گزشتہ دورہ بھارت کے دوران کچھ معاملات پر تحقیق کرنے کے لیے پاکستان آئے تھے انہوں نے کل یونس خان اور عمر گل کو بلوایا تھا تاہم ذرائع کے مطابق یونس خان اس اہلکار کے رویے پر ناخوش تھے ۔ اس لیے انہوں نے آج میچ میں شرکت سے انکار کیا۔ یونس خان ٹیم کے ہمراہ سٹیڈیم نہیں آئے اور کچھ تاخیر سے سٹیڈیم پہنچے۔

ذرائع کے مطابق چیف سلیکٹر صلاح الدین صلو اور سلیکٹر سلیم جعفر اور چئرمین پی سی بی نے انہیں میچ کھیلنے پر آمادہ کیا۔

اس سلسلے میں صلاح الدین صلو سے رابطہ کرنے کی کوشش کی لیکن انہوں نے اپنا فون نہیں اٹھایا البتہ سلیکٹر سلیم جعفر نے ایسے کسی واقعے سے انکار کیا اور ان کا کہنا تھا کہ یونس خان سٹیڈیم میں تاخیر سے آئے تھے اس کی وجہ ان کا کوئی ذاتی مسئلہ تھا۔