بارش کی وجہ سے میچ ختم کرنے کا اعلان کر دیا گیا

بھارت نے آسٹریلیا کو فتح کے لیے 195 رن کا ہدف فراہم کیا تھا تاہم پہلے بارش کی وجہ سے یہ ہدف کم کر کے 141 رن کیا گیا اور آسٹریلوی اننگز کے دوران دوسری مرتبہ بارش کے بعد ایمپائروں نے میچ ختم کرنے کا اعلان کر دیا۔

وقفے وقفے سے ہونے والی تیز بارش کی وجہ سے پہلے بھارتی اننگز کو پنتالیس اوورز تک محدود کر دیا گیا جس میں بھارت نے دس وکٹوں کے نقصان پر ایک سو چورانوے رن بنائے۔

بھارت کی جانب سے دھونی اور گوتم گمبھیر کے علاوہ کوئی بھی بلے باز قابلِ ذکر سکور نہ کر سکا جبکہ آسٹریلیا کی جانب سے بریٹ لی نے شاندار بالنگ کا مظاہرہ کرتے ہوئے صرف ستائیس رن کے عوض پانچ وکٹیں حاصل کیں۔ بریٹ لی کے علاوہ بریکن، نوفکے اور جانسن نے ایک ایک وکٹ لی جبکہ دو بھارتی کھلاڑی رن آؤٹ ہوئے۔

جواب میں آسٹریلیا نے جب بیٹنگ شروع کی تو چوتھے اوور میں پہلی وکٹ گرتے ہی میچ بارش کی وجہ سے روک دیا گیا۔ جب میچ دوبارہ شروع ہوا تو آسٹریلیا کو فتح کے لیے 141 رن کا تبدیل شدہ ہدف دیا گیا۔

اس ہدف کے تعاقب میں انتالیس کے مجموعی سکور تک آسٹریلیا کی مزید دو وکٹیں گر گئیں۔ تاہم اس موقع پر بارش دوبارہ شروع ہوگئی جس کے بعد میچ ختم کرنے کا اعلان کیا گیا۔ بھارت کی جانب سے سریسانتھ نے دو جبکہ ایشانت شرما نے ایک وکٹ حاصل کی۔