عبدالرشید شکور بی بی سی اردو ڈاٹ کام، کراچی

	آسٹریلیوی وفد پاکستان کے مختلف سٹیڈیمز کا دورہ کر رہا ہے

پاکستان کرکٹ بورڈ کے چیف آپریٹنگ آفیسر شفقت حسین نغمی نے بی بی سی کو بتایا کہ سیکریٹری داخلہ سید کمال شاہ نے آسٹریلوی سکیورٹی وفد کو بریفنگ دی اور کہا کہ وفد کے ذہن میں جس طرح کے خدشات ہیں اس پر کھل کر بات کی جائے۔

شفقت نغمی نے کہا کہ آسٹریلوی منیجر کا کہنا تھا کہ انہوں نے اس سے قبل بھی مختلف ممالک میں اس طرح کی بریفنگ میں شرکت کی تھی لیکن وہ پاکستانی حکام کی مفصل اور پیشہ ورانہ انداز میں دی گئی بریفنگ سے بے حد متاثر ہوئے ہیں۔

شفقت نغمی کے مطابق وفد کے ارکان کا یہ بھی کہنا تھا کہ نقشے پر جو کچھ ہے اصل میں صورتحال بہت مختلف ہے۔ ان کے دورے سے بہت سے معاملات پر غلط فہمیاں دور ہونے میں مدد ملی۔ ان کا اشارہ میرپور کی طرف تھا کہ جو بقول ان کے نقشے پر بارڈر کے بہت قریب معلوم ہوتا ہے لیکن حقیقت میں ایسا نہیں ہے۔
آسٹریلوی سکیورٹی وفد جمعہ کو وطن واپس جا رہا ہے۔

جب شفقت نغمی سے جنوبی افریقن کرکٹ حکام کی سکیورٹی کے بارے میں تشویش پر مبنی خبروں کی بابت پوچھا گیا تو انہوں نے اس سے لاعلمی کا اظہار کیا۔

پاکستان کرکٹ بورڈ کے ڈائریکٹر کمیونیکیشن ڈاکٹر احسن حمید نے بھی ان خبروں کی تردید کی ہے کہ جنوبی افریقی کرکٹ یونین پاکستان میں سکیورٹی کے بارے میں فکر مند ہے اور وہ صورتحال کا جائزہ لینے کے لیے اپنا وفد پاکستان بھیج رہا ہے۔

کرکٹ جنوبی افریقہ کے جنرل منیجر آپریشنز برائن بیسن کا بیان پاکستانی و غیرملکی اخبارات اور ویب سائٹ کی زینت بنا ہے جس میں پاکستان میں ہونے والے خود کش حملوں کے بعد سکیورٹی کے خدشات ظاہر کیے گئے ہیں لیکن ساتھ ہی یہ بھی کہا گیا ہے کہ جنوبی افریقی ٹیم کا دورہ فی الحال پروگرام کے مطابق ہے۔ تاہم وہ سکیورٹی کے بارے میں آسٹریلوی وفد کی رپورٹ حاصل کرنا چاہیں گے۔

واضح رہے کہ جنوبی افریقی کرکٹ ٹیم کو ستمبر کے اواخر میں پاکستان کے دورے میں دو ٹیسٹ اور پانچ ون ڈے انٹرنیشنل میچز کھیلنے ہیں۔ چار سال قبل جنوبی افریقہ نے پاکستان کے دورے میں کراچی میں ٹیسٹ کھیلنے سے انکار کردیا تھا۔