کاشف قمر بی بی سی اردو ڈاٹ کام، گیانا، ویسٹ انڈیز

	جنوبی افریقہ کی شکست کے بعد عالمی کپ میں سیمی فائنل کی دوڑ اب کئی ٹیموں کے لیے کھل گئی ہے۔

سنیچر کو جنوبی افریقہ کے خلاف حیران کن جیت کے بعد بی بی سی کی اردو سروس سے گفتگو میں محمد اشرفل نے کہا کہ جنوبی افریقہ پر بنگلہ دیش کی جیت سے عالمی کپ کے سیمی فائنل تک پہنچنے کی دوڑ اب کھلا مقابلہ بن گئی ہے۔ اور انگلستان کے خلاف بنگلہ دیش کی ٹیم اچھی کارکردگی کا مظاہرہ کرے گی۔

محمد اشرفل کے بقول اگر ٹیم اسی کارکردگی کو برقرار رکھتی ہے جو سنیچر کو جنوبی افریقہ کے خلاف پیش کی گئی ، تو نہ صرف انگلستان بلکہ آئرلینڈ اور ویسٹ انڈیز کے خلاف بھی بنگلہ دیش کے اچھے امکانات ہیں۔

انہوں نے کہا کہ جنوبی افریقہ کی شکست کے بعد عالمی کپ میں سیمی فائنل کی دوڑ اب کئی ٹیموں کے لیے کھل گئی ہے۔

سنیچر کے میچ کا ذکر کرتے ہوئے محمد اشرفل کا کہنا تھا کہ ٹیم کی حکمت عملی یہی تھی کہ وکٹیں بچائی جائیں اور اس کے نتیجے میں آخری اووروں میں رن بھی بن جائیں گے۔

ان کا کہنا تھا کہ ٹیم کو امید تھی کہ اگر دو سو تیس یا چالیس تک سکور ہوجائے گا تو تین سپن بولروں کے ساتھ دوسری ٹیم کے لیے یہ ایک مشکل ہدف ہوگا لیکن ڈھائی سو کے سکور کے بعد تو ٹیم بہت پراعتماد ہوگئی تھی۔

توجہ اچھا کھیلنے پر ہے  ٹیم گزشتہ کچھ عرصے سے بہت اچھا کھیل رہی ہے اور ٹیم کی توجہ اپنی کارکردگی بہتر بنانے اور مستقل اچھا کھیلنے پر ہے نہ کہ نمبر ایک ٹیم کو ہرانے پر۔

انہوں نے بتایا کہ جب چوراسی رن اور چار کھلاڑی آؤٹ ہونے پر وہ خود بیٹنگ کرنے گئے تو صورتحال نیوزی لینڈ والے میچ جیسی ہی تھی اور حکمت عملی یہی تھی کہ احتیاط سے بغیر کسی نقصان کے ایک ایک اوور سنبھل سنبھل کر کھیلنا ہے۔

لیکن جب آفتاب احمد نے جارحانہ انداز میں کھیلنا شروع کیا تو بقول اشرفل، انہوں نے بھی اپنا کھیل کھیلنے کا فیصلہ کیا اور تیزی سے رن بنانا شروع کردیے۔

اس سوال پر کہ جو بھی ٹیم عالمی نمبر ایک بنتی ہے، بنگلہ دیش اس کو ہرادیتا ہے، اشرفل کا کہنا تھا کہ ان کی ٹیم گزشتہ کچھ عرصے سے بہت اچھا کھیل رہی ہے اور ٹیم کی توجہ اپنی کارکردگی بہتر بنانے اور مستقل اچھا کھیلنے پر ہے نہ کہ نمبر ایک ٹیم کو ہرانے پر۔