مناف پٹیل نے چار ووکٹیں حاصل کئیں

وارم اپ کے میچوں کے آخری مرحلے میں کھیلنے جانے والے ان مقابلوں میں نیوزی لینڈ اور سری لنکا کے میچ کے علاوہ باقی تمام میچوں میں زیادہ سکور نہیں بن سکا۔

بھارت اور ویسٹ انڈیز کے درمیان میچ مکمل طور پر یک طرفہ رہا اور بھارت نے یہ میچ باآسانی نو وکٹوں سے جیت لیا۔ ویسٹ انڈیز پہلے بیٹنگ کرتے ہوئے پچیس اعشاریہ پانچ گیندوں پر پچاسی رنز بنا کر آؤٹ ہو گئی۔

ویسٹ انڈیز کی ٹیم شروع ہی سے مشکلات کا شکار رہی اور ان کی ووکٹیں تواتر سے گرتی رہیں۔ بھارت کی طرف سے مناف پٹیل اور عرفان پٹھان نے شاندار بالنگ کی۔ مناف نے چھ اوور میں دس رنز دے کر چار کھلاڑیوں کو آؤٹ کیا جبکہ عرفان پٹھان نے چھ اوور میں پچیس رنز دے کر تین کھلاڑیوں کو آؤٹ کیا۔

	آسٹریلیا نے انگلینڈ کو ہرا دیا

ایک اور وارم اپ میچ میں آسٹریلیا نے انگلینڈ کو ہرا دیا۔ انگلینڈ کی ٹیم نے پہلے کھیلتے ہوئے اڑتالیس اعشاریہ تین اوور میں ایک سو ستانوے رنز بنائے۔

انگلیڈ کی اننگز کی خاص بات کپتان مائیکل وان اور ائین بیل کی اننگز تھیں۔ مائیکل وان نے باسٹھ اور بیل نے چھپن رنز بنائے۔

آسٹریلیا نے مطلوبہ سکور پانچ ووکٹ کے نقصان پر حاصل کر لیا۔ آسٹریلیا کی طرف سے گلکرسٹ نے بہتر اور شین واسٹن نے باون رنز بنائے۔

نیوزی لینڈ اور سری لنکا کے میچ میں نیوزی لینڈ نے سری لنکا کے لیے دو سو پچاسی کا ہدف مقرر کیا۔

سری لنکا کی ٹیم یہ ہدف حاصل نہ کر سکی اور پوری ٹیم دو سو سینتیس رنز بنا کر آؤٹ ہو گئی۔ سری لنکا کی اننگز میں ترنگا نے ایک سو چھ رنز بنائے لیکن ان کی اننگز کے باوجود سری لنکا یہ میچ نہ جیت سکا۔