عبدالرشید شکور بی بی سی اردو ڈاٹ کام، کراچی

	محمد سمیع پیر کی شب ویسٹ انڈیز کے لیے روانہ ہوں گے

اس تاخیر کی بنیادی وجہ یہ ہے کہ چونکہ پاکستان کرکٹ بورڈ نے یاسرعرفات اور محمد سمیع کو اس جواز کے تحت ٹیم میں شامل کیا ہے کہ شعیب اختر اور محمد آصف ان فٹ ہیں لہذا اسے آئی سی سی کو ان فٹ بولرز کی میڈیکل رپورٹس بھی بھیجنی ضروری ہیں، جو آئی سی سی کو ابھی تک نہیں ملی ہیں۔

یہ رپورٹس آئی سی سی کو پیر کی شام تک نہیں مل سکی تھیں۔

پاکستان کرکٹ بورڈ کے ذرائع کا کہنا ہے کہ انہیں توقع ہے کہ محمد آصف اور شعیب اختر کی میڈیکل رپورٹس پیر کی شب یا منگل تک مل جائیں گی جنہیں محمد سمیع اور یاسرعرفات کی ٹیم میں شمولیت کی درخواست کے ساتھ آئی سی سی کو بھیج دیا جائے گا۔

آئی سی سی کے ترجمان سمیع الحسن نے بھی پیر کے روز بی بی سی کو بتایا کہ پاکستان کرکٹ بورڈ کی طرف سے کھلاڑیوں کی تبدیلی سے متعلق درخواست آئی سی سی کو نہیں ملی تھی۔ ان کا کہنا تھا کہ جیسے ہی درخواست ملی آئی سی سی کی ٹیکنیکل کمیٹی اس کا جائزہ لے گی۔

پاکستان کرکٹ بورڈ اس سے قبل عبدالرزاق کی جگہ اظہرمحمود کی ٹیم میں شمولیت کی منظوری آئی سی سی سے حاصل کرچکا ہے۔ عبدالرزاق گھٹنے میں فریکچر کی وجہ سے ورلڈ کپ سے باہر ہوگئے ہیں۔

محمد آصف اور شعیب اختر کی رپورٹس میں تاخیر کو بعض حلقے شک و شبے کی نظر سے دیکھتے ہیں کیونکہ ان کا موقف ہے کہ محمد آصف اور شعیب اختر انگلینڈ علاج کے بجائے خفیہ ڈوپ ٹیسٹ کے لیے جاتے رہے ہیں۔دوسری جانب پاکستان کرکٹ بورڈ اس قسم کی اطلاعات کی مسلسل تردید کرتا رہا ہے۔

محمد سمیع پیر کی شب ویسٹ انڈیز کے لیے روانہ ہوں گے جبکہ یاسرعرفات آئندہ دو روز میں روانہ ہوں گے۔

پاکستان کرکٹ بورڈ کے ذرائع کا کہنا ہے کہ زبانی طور پر آئی سی سی کو اس بارے میں اعتماد میں لے لیا گیا ہے اور جب تک یہ دونوں بولرز ویسٹ انڈیز پہنچیں گے انٹرنیشنل کرکٹ کونسل کی طرف سے انہیں ٹیم میں شامل کرنے کی منظوری آچکی ہوگی۔