عبدالرشید شکور بی بی سی اردو ڈاٹ کام، کراچی

	پاکستان کرکٹ بورڈ نے میلکم سپیڈ کے ریمارکس پر احتجاج کیا ہے

اس ضمن میں آئی سی سی کے چیف ایگزیکٹیو میلکم سپیڈ اور پاکستان کرکٹ بورڈ کی ایڈہاک کمیٹی کے سربراہ ڈاکٹر نسیم اشرف کے الفاظ منظر عام پر آئے ہیں۔

صورتِ حال آئیڈیل نہیں

واضح رہے کہ آئی سی سی نے ورلڈ کپ میں رینڈم ڈوپ ٹیسٹ کے ساتھ ساتھ ٹارگٹ ڈوپ ٹیسٹ کا طریقہ کار بھی اختیار کیا ہے جس کے تحت کسی بھی کھلاڑی کو ڈوپ ٹیسٹ کے لئے کہا جاسکے گا۔

عام خیال یہ ہے کہ آئی سی سی نے یہ طریقہ شعیب اختر اور محمد آصف کو گرفت میں لینے کے لیے اختیار کیا تھا تاہم دونوں بولرز ورلڈ کپ کے لیے اعلان کردہ ٹیم سے باہر ہوچکے ہیں۔ اس کی وجہ ان کی فٹنس بتائی گئی ہے لیکن اکثر سینیئرکھلاڑی اسے ڈوپنگ قرار دے رہے ہیں۔

پاکستان کرکٹ بورڈ کےسربراہ ڈاکٹر نسیم اشرف کا کہنا ہے کہ شعیب اختر اور محمد آصف کے بارے میں میلکم سپیڈ کا بیان غیرضروری اور غیرذمہ دارانہ ہے۔

ان کا کہنا تھا کہ ’ پاکستان کرکٹ بورڈ نے اپنی اینٹی ڈوپنگ پالیسی کے تحت ان بولرز کو ممنوعہ ادویات کے استعمال پر پابندی کی سزا دی تھی۔ ان دونوں کو اپیل کا حق دیاگیا تھا اور ایک غیرجانبدار اپیل ٹریبونل نے ان کی سزا ختم کی۔ خود آئی سی سی شعیب اختر اور محمد آصف کو بری کیے جانے کی قانونی حیثیت تسلیم کرچکی ہے۔‘

پاکستان کرکٹ بورڈ نے اس سلسلے میں آئی سی سی کے صدر پرسی سون کو خط تحریر کیا ہے جس میں میلکم سپیڈ کے ریمارکس پر احتجاج کیا گیا ہے۔

اوول ٹیسٹ کے معاملے پر پاکستان کرکٹ بورڈ اور آئی سی سی کے کشیدہ تعلقات کسی سے پوشیدہ نہیں جو ایلیٹ پینل سے امپائر ڈیرل ہیئر کے اخراج پر منتج ہوئے تھے۔