محمد آصف نے ابتدائی دو وکٹیں حاصل کیں

جنوبی افریقہ کو پاکستان کی برتری ختم کرنے کے لیے مزید چھبیس رن درکار ہیں جبکہ اس کی سات وکٹیں باقی ہیں۔

تفصیلی سکور کارڈ

پورٹ الزبتھ ٹیسٹ، دوسرا دن تصاویر میں

پورٹ الزبتھ ٹیسٹ، تصاویر

اس سے قبل پاکستان کی ٹیم دوسرے دن اپنی پہلی اننگز میں 265 رن بنا کر آؤٹ ہوگئی اور یوں اسے جنوبی افریقہ پر 141 رن کی برتری حاصل ہوئی تھی۔

جنوبی افریقہ کے آؤٹ ہونے والے آخری کھلاڑی ہاشم آملہ تھے جنہیں محمد سمیع نے بولڈ کیا۔ جب تیسری وکٹ گری تو جنوبی افریقہ کا مجموعی سکور 61 رن تھا تاہم اس کے بعد ژاک کیلس اور ایشول پرنس نے اپنی ٹیم کو سنبھالا دیا۔

کیلس نے اپنی نصف سنچری بھی مکمل کی اور اب تک ان دونوں بلے بازوں نے چوتھی وکٹ کی شراکت میں چوّن رن بنائے ہیں۔ جب کھیل ختم ہوا تو کیلس پچاس جبکہ پرنس اکیس رن پر ناٹ آؤٹ تھے۔

جنوبی افریقہ کی دوسری اننگز کا آغاز اچھا نہ تھا اور اس کی پہلی وکٹ صرف 18 کے مجموعی سکور پر گری جب کپتان گریم سمتھ دس رن بنا کر محمد آصف کی گیند پر انضمام الحق کے ہاتھوں کیچ ہوئے۔ اے بی ڈی ویلیئرز محمد آصف کا دوسرا شکار بنے۔ انہوں نے پندرہ رن بنائے۔

اس سے قبل پاکستان کی جانب سے کپتان انضمام الحق نے عمدہ بلے بازی کا مظاہرہ کیا۔ وہ بانوے رن بنا کر ناٹ آؤٹ رہے۔ انضمام الحق اور محمد آصف کے درمیان دسویں وکٹ کے لیے 74 رن کی شراکت داری ہوئی جو پورٹ الزبتھ کے میدان پر دسویں وکٹ کی شراکت کا نیا ریکارڈ ہے۔

	انضمام الحق 92 رن بنا کر ناٹ آؤٹ رہے

دوسرے دن کی خاص بات مکھایا نتینی کی ٹیسٹ کرکٹ میں تین سو وکٹیں تھیں۔ نتینی نے اپنی تین سوویں وکٹ پاکستان کے محمد سمیع کو آؤٹ کر کے حاصل کی۔

وہ یہ اعزاز حاصل کرنے والے جنوبی افریقہ کے تیسرے بالر بن گئے ہیں۔ ان سے قبل ایلن ڈونلڈ اور شان پولاک ٹیسٹ کرکٹ میں یہ سنگِ میل عبور کر چکے ہیں۔

میچ میں جنوبی افریقہ نےٹاس جیت کر پہلے بیٹنگ کا فیصلہ کیا تھا۔ پاکستان کے فاسٹ بولر شعیب اختر نے عمدہ بولنگ کرتے ہوئے جنوبی افریقہ کی ٹیم کو شروع ہی میں مشکلات سے دوچار کر دیا تھا۔ جنوبی افریقہ کے پہلے چار کھلاڑی انچاس رنز پر آؤٹ ہو چکے تھے۔

پاکستان کی جانب سے شعیب اختر نے چار، دانش کنیریا نے تین، محمد آصف نے دو اور محمد سمیع نے ایک وکٹ حاصل کی تھی۔

پاکستان نے ٹیم میں تین تبدیلیاں کیں۔ محمد یوسف، شیعب اختر اور محمد سمیع کو ٹیم شامل کیا ہے جبکہ بیسٹمین فیصل اقبال اور بولر شاہد نذیر اور رانا نوید الحسن کو ٹیم سے باہر کر دیا گیا ہے۔

	مکایا نتینی پاکستان کی ٹاپ آرڈر کوتباہ کر دیا۔

پہلے ٹیسٹ میں جنوبی افریقہ نے پاکستان کو شکست دے کر تین میچوں کی سیریز میں ایک صفر کی برتری حاصل کر لی ہے۔

پاکستان کی ٹیم : انضمام الحق (کپتان) ، یونس خان ، عمران فرحت، محمد حفیظ، یاسر حمید، محمد یوسف، کامران اکمل، شعیب اختر، محمد سمیع، محمد آصف اور دانش کنریا۔

جنوبی افریقہ : جی سی سمتھ، اے بی ولیئر، ایچ ایم آملا، جے ایچ کالِس، اے جی پرِنس، ایم وی باؤچر، ایس ایم پولک، اے جے ہال، اے نیل، ایم نتینی۔