رفعت اللہ اورکزئی بی بی سی اردو ڈاٹ کام پشاور

	پی سی بی کے چیئرمین ڈاکٹر نسیم اشرف

جمعے کے روز پشاور پریس کلب میں سرحد سپورٹس رائیٹرز ایسوسی ایشن کے ’میٹ دی پریس‘ پروگرام میں اظہار خیال کرتے ہوئے پی سی بی کے چیئرمین ڈاکٹر نسیم اشرف نے بتایا کہ کرکٹ بورڈ نے سپورٹس ڈائریکٹریٹ فاٹا کے ساتھ مل کر فاٹا میں کرکٹ کے کھیل کے فروغ کے لئے ایک جامع منصوبہ بنایا ہے جس پر بہت جلد کام شروع ہوگا۔

ان کا کہنا تھا کہ اس سلسلے میں جمعہ کے روز انہوں نےگورنر ہاؤس پشاور میں گورنر سرحد علی محمد جان اورکزئی سے ملاقات کی اور ان سے قبائلی علاقوں میں کرکٹ اور دیگر کھیلوں کے فروغ کے حوالے سے مختلف امور پر تبادلۂ خیال کیا۔

انہوں نے کہا کہ علی محمد جان اورکزئی نے قبائلی علاقوں میں کرکٹ کی سرگرمیاں شروع کرنے میں خصوصی دلچسپی ظاہر کی اور کہا کہ حکومت نے فاٹا میں سپورٹس سٹیڈیمز کی تعمیر کے منصوبے پر پہلے ہی کام شروع کیا ہوا ہے۔

کرکٹ بورڈ اس سلسلے میں ہر ممکن امداد فراہم کرے گا جس میں گراؤنڈز کی تعمیر اور کھلاڑیوں کو سہولتوں کی فراہمی شامل ہے جبکہ ٹورنامنٹس کا انعقاد بھی کیا جائے گا۔ ڈاکٹر نسیم اشرف

چیئرمین کرکٹ بورڈ سے سوال کیا گیا کہ حکومت قبائلی علاقوں میں شدت پسندی کا خاتمہ کرنے کے لئے وہاں خصوصی توجہ رہی ہے اور کرکٹ کا فروغ بھی کیا اسی کڑی کا حصہ ہے؟

تو اس پر ان کا کہنا تھا: ’اگرچہ آج کی گورنر سے ملاقات خصوصی طور پر اس سلسلے میں تو نہیں تھی لیکن اگر فاٹا میں کوئی بم یا گرنیٹھ سے کھیلنے کی بجائے کھیل کود میں وقت دلچسپی لیتا ہے تو یہ تو ملک و قوم کےلئے اچھی بات ہے۔‘

ڈاکٹر نسیم اشرف نے قومی کرکٹ ٹیم اور کھلاڑیوں کے کارکردگی کے حوالے سے مختلف سوالوں کا جواب دیا۔

اس سے قبل سرحد سپورٹس رائیٹرز ایسوسی ایشن کے صدر امجد عزیز ملک اور جنرل سیکرٹری عظمت اللہ نے پشاور میں سپورٹس جرنلسٹس کی کارکردگی اور ان کو درپیش مسائل سے پی سی بی کے چیئرمین کو آگاہ کیا۔