عبدالرشید شکور بی بی سی اردو ڈاٹ کام، کراچی

	چئیرمین کا کہنا ہے کہ مسئلے کا حل میرٹ کے ذریعے ہونا چاہیئے

شہریارخان نے پیر کو لندن سے کراچی پہنچنے پر بی بی سی سے بات کرتے ہوئے کہا ہے کہ’ وہ حالیہ مسئلے کو میرٹ پر حل کرنے کی خواہش رکھتے ہیں لیکن اگر یہ محسوس ہو کہ ایک قانون ایشیائیوں کے لیئے کچھ اور ہے اور دوسروں کے لیئے کچھ اور تو لامحالہ ہمیں احتجاج تو کرنا پڑے گا‘۔

پاکستان کرکٹ بورڈ کے چیئرمین کے خیال میں’ بال ٹمپرنگ کے قانون میں نظرثانی کی ضرورت ہے اور اس میں موجود امپائرز کو دیئے گئے لامحدود اختیارات ختم ہونے چاہئیں اور غیر جانبدار میچ ریفری کا کردار بھی ضروری ہے‘۔

شہریارخان نے آئی سی سی کے سابق صدر احسان مانی کی اس بات سے اتفاق نہیں کیا کہ پاکستان کرکٹ بورڈ نے آئی سی سی سے آسٹریلوی امپائر ڈیرل ہیئر کو پاکستان کے میچوں میں تعینات نہ کرنے کے بارے میں کوئی باضابطہ بات نہیں کی۔

شہریارخان کا کہنا ہے کہ ’احسان مانی چونکہ پاکستانی ہیں لہذا ہم نے انہیں اس معاملے میں شریک نہیں کیا تاکہ ان کی غیرجانبداری پر کسی کو شک نہ ہو حالانکہ انہوں نے اپنے دور میں پاکستان سے ہمدردی ہونے کے باوجود تمام معاملات صاف شفاف طریفے سے نمٹائے‘۔

انہوں نے کہا کہ ’جہاں تک ڈیرل ہیئر کے مسئلے پر آئی سی سی سے باضابطہ بات کا تعلق ہے تو تمام خط وکتابت میلکم اسپیڈ سے ہوتی رہی ہے اور پاکستان کرکٹ بورڈ نے زبانی و تحریری طور پر آئی سی سی کو مطلع کیا ہے کہ اسے ڈیرل ہیئر سے شکایت ہے تاہم اس مرحلے پر وہ اس سے زیادہ کچھ نہیں کہنا چاہتے‘۔

شہریارخان نے میلکم اسپیڈ کے اس بیان پر تبصرہ کرنے سے انکار کردیا کہ بال ٹمپرنگ کا ٹھوس ثبوت موجود ہے۔ پاکستان کرکٹ بورڈ کے چیئرمین کے مطابق وہ انٹرنیشنل کرکٹ کونسل سے محاذ آرائی نہیں چاہتے اور انہیں امید ہے کہ مسئلے کا حل خوش اسلوبی سے نکل آئے گا۔