یو ایس اوپن سے پہلے شیراپوا کو پانچ گرینڈ سلیم مقابلوں میں سیمی فائنل کے مرحلے پر شکست کا سامنا کرنا پڑا

سن 2004 کی ومبلڈن چیمیئن ماریہ شیراپوا نے اپنی مدمقابل جسٹین ہینن ہارڈین کو چھ چار چھ چار سے شکست دی۔

انیس سالہ روسی کھلاڑی میچ کے آغاز میں ہی اپنی اوپننگ سروس گیم ہار گئی تھیں۔ لیکن بعد میں وہ میچ میں واپس آئیں اور انہوں نے دو بریکس کے ساتھ پہلا سیٹ چھ چار سے جیتا۔

شیراپوا نے شاندار سروس کے ساتھ دوسرا سیٹ ایک بریک کے ساتھ تقریباً ڈیڑھ گھنٹے میں چھ چار سے جیتا۔

بیلجیئم کی جسٹین ہینن ہارڈین نے اس سال فرینچ اوپن میں کامیابی حاصل کی تھی۔ لیکن اس کے بعد سے انہیں تینوں گرینڈ سلیم مقابلوں کے فائنل میں شکست کا سامنا کرنا پڑا۔

میچ پریکٹس کی کمی کو جسٹین ہینن ہارڈین کی شکست کی بنیادی وجہ قرار دیا جا رہا ہے۔ زخمی ہونے کی وجہ سے انہوں نے ومبلڈن اور یو ایس اوپن کے درمیان صرف ایک ٹورنامنٹ میں حصہ لیا ہے۔

ماریہ شیراپوا حال ہی میں چار مرتبہ جسٹین ہینن ہارڈین سے شکست کھا چکی ہیں اور ومبلڈن جیتنے کے بعد انہیں اپنے دوسرے بڑے اعزاز کے لیئے دو سال تک انتظار کرنا پڑا ہے۔