گنگولی کے بیٹنگ آرڈر میں بھی تبدیلی کی گئی

جنوبی افریقہ کے آؤٹ ہونے والے واحد کھلاڑی اے بی ڈی ویلیئرز تھے جو بائیس رن بنا کر ظہیر خان کی گیند پر آؤٹ ہوئے۔

تفصیلی سکور کارڈ کے لیے یہاں کلک کریں

اس سے قبل بھارت کی ٹیم اپنی دوسری اننگز میں ایک سو انہتر رن بنا کر آؤٹ ہوگئی۔ بھارت کے آؤٹ ہونے والے آخری کھلاڑی مناف پٹیل تھے جو سٹین کا چوتھا شکار بنے۔ بھارت کی جانب سے سورو گنگولی اور کپتان راہول ڈراوڈ کے علاوہ کوئی بھی بلے باز قابلِ ذکر کارکردگی کا مظاہرہ نہ کر سکا۔

دوسری اننگز میں بھارتی ٹیم کا آغاز اچھا نہ تھا اور صرف 6 کے مجموعی سکور پر دونوں اوپنر پویلین میں واپس جا چکے تھے۔بھارت نے دوسری اننگز میں بیٹنگ آرڈر میں تبدیلی کی اور پہلی اننگز میں سنچری بنانے والے وسیم جعفر کے ساتھ وریندر سہونگ سے اوپننگ کروائی تاہم جعفر چار اور سہواگ صرف دو رن بنا سکے۔

ابتدائی نقصان کے بعد راہول ڈراوڈ اور سورو گنگولی کے درمیان تیسری وکٹ کے لیے 84 رن کی شراکت کی بدولت بھارتی ٹیم بہتر پوزیشن میں آ گئی تھی۔ تاہم گنگولی کے آؤٹ ہونے کے بعد یکے بعد دیگرے دو بھارتی وکٹیں گریں۔

پہلے 114 کے مجموعی سکور پر راہول ڈراوڈ سنتالیس کے انفرادی سکور پر آؤٹ ہوئے اور صرف ایک رن بعد ہی وی وی ایس لکشمن رن آؤٹ ہوگئے۔ بعد میں آنے والے کھلاڑیوں میں دنیش کارتک کے علاوہ کوئی بھی بلے باز جم کر نہ کھیل سکا۔ جنوبی افریقہ کی جانب سے سٹین نے چار جبکہ پولاک، ہیرس، نتنی اور کیلس نے ایک ایک وکٹ حاصل کی۔

کھیل کے تیسرے دن جنوبی افریقہ کی پوری ٹیم پہلی اننگز میں 373 رنز بنا کر آؤٹ ہوگئی تھی اور بھارت کو اکتالیس رن کی برتری حاصل ہوئی تھی۔

	جنوبی افریقہ کے کپتان گریم سمتھ وکٹ کے حصول پر خوش

بھارت کی طرف سے انیل کمبلے نے چار اور سری سنتھ نے دو وکٹیں حاصل کی تھیں جبکہ جنوبی افریقہ کے کپتان گریم سمتھ نے 94، ہاشم آملہ نے 63 اور ژاک کیلس نے 54 رنز بنائے تھے۔ اس کے علاوہ وکٹ کیپر مارک باؤچر نے بھی اپنی نصف سنچری مکمل کی۔

بھارت کی پوری ٹیم پہلی اننگز میں 414 رنز بناکر آؤٹ ہوگئی تھی۔ بھارت کے بلے باز وسیم جعفر نے 116 رنز بنائے تھے جبکہ سچن تندولکر 64 ، سوروگنگولی 66 اور وریندر سہواگ 40 رنز بنا کر نمایاں رہے تھے۔

اس سے پہلے دونوں ٹیموں کے درمیان دو ٹیسٹ میچ کھیلے جا چکے ہیں اور دونوں نے ہی ایک ایک میچ میں فتح پائی ہے۔