بیل نے شاندار بیٹنگ کرتے ہوئے 71 رنز بنائے

انگلینڈ کی جانب سے کپتان فلنٹاف نے 42 رنز بنائے۔ وہ اور کالنگ ووڈ ناٹ آؤٹ رہے ہیں۔ ووڈ ابھی 25 رنز کے ذاتی سکور پر کھیل رہے ہیں۔

بیل اور پیٹرسن نے مل کر 108 رنز بنائے۔اس میچ کی ایک خاص بات یہ رہی کہ آخری میچ کھیلتے ہوئے میگرا نے دو وکٹ لیے۔ ناساز گار موسم کا اثر کھیل پر پڑا اور کھیل مقامی وقت کے مطابق تقریبًا گیارہ بجے شروع ہوسکا۔

اس میچ میں جیمس ایڈرسن، میتھیو ہوگارڈ کی جگہ کھیل رہے ہیں۔ سٹراس 21 رنز کے ذاتی سکور پر آؤٹ ہوگئے۔ انگلینڈ نے کھانے کے وقفے تک ایک وکٹ کے نقصان پر 58 رنز بنالیے تھے۔ پہلے دن کے کھیل کےسب سے کامیاب کھلاڑی ائین بیل ثابت ہوئے جنہوں نے پیٹرسن کے ساتھ مل کر اچھے کھیل کا مظاہرہ کیا۔

	میگرا نے انگلینڈ کے دو بلے بازوں کوآؤٹ کیا

میگرا نےاس میچ میں اچھی بالنگ کی اور وہ ایک حد تک پیٹرسن کو رنز بنانے سے روکنے میں کامیاب رہے۔ کچھ دیر تک آسٹریلیائی بالرز انگلینڈ پر حاوی رہے اور ایک بار حالت یہ ہوگئی کہ انگلینڈ کے دو وکٹوں کے نقصان پر سکور 162 رنز تھا اور محض پانچ رنز کا اضافہ کرنے کے بعد انگلینڈ کے تیسرے کھلاڑی بھی آؤٹ ہوگئے۔

اس میچ سے قبل ایشز سیریز کے چاروں میچوں میں آسٹریلیا نے کامیابی حاصل کی تھی اور اگر انگلینڈ اس میچ کو جتینے یا برابر کرنے میں کامیاب نہ ہوا تو انگلینڈ کو ’وائٹ واش‘ کا سامنا کرنا پڑے گا۔