پیٹرسن انگلینڈ کی آخری امید تھے مگر وہ بریٹ لی کی چوتھی گیند پر آؤٹ ہوگئے

میچ کے پانچویں روز انگلینڈ کی ٹیم ابتدائی نوے منٹ کے کھیل کے دوران باقی وکٹیں کھونے کے بعد تین سو ستر رنز بنا کر آؤٹ ہوگئی۔ گزشتہ روز اس نے پانچ کھلاڑیوں کے نقصان پر دو سو ترانوے رنز بنائے تھے۔

برسبین ٹیسٹ کا تازہ سکور

پیر کو جب میچ شروع ہوا تو انگینڈ کے کیون پیٹرسن بریٹ لی کی چوتھی گیند پر اپنے گزشتہ روز کے سکور میں بغیر کسی رن کا اضافہ کیے ڈیمیئن مارٹن کے ہاتھوں کیچ آؤٹ ہوگئے۔ وہ آٹھ رنز کی کمی سے اپنی سنچری مکمل نہ کر سکے۔

پیٹرسن کے آؤٹ ہونے کے بعد ایشلے گائلز اور جونز نے اچھے سٹروک کھیلے مگر جونز گلین میگرا کی گیند سٹمپس پر ٹکرا جانے کے بعد 33 رنز پر آؤٹ ہوئے۔

گائلز اور میتھیو ہوگارڈ سلپ میں کیچ آوٹ ہوئے۔ ان دونوں کو سٹیورٹ کلارک نے آؤٹ کیا۔ کلارک نے بہتّر رنز دے کر چار کھلاڑیوں کو آؤٹ کیا۔ شین وارن نے بھی دوسری اننگز میں چار وکٹیں لیں۔ میگرا اور بریٹ لی کے حصے میں ایک ایک وکٹ آئی۔

پہلے ٹیسٹ کے چوتھے دن آسٹریلیا نے انگلینڈ کو 648 رن کا ہدف دے کر اننگز ڈکلیئر کر دی تھی۔ دوسری اننگز میں آسٹریلیا نے ایک وکٹ کھو کر دو سو دو رنز بنانے کے بعد انگلینڈ کو بلے بازی کی دعوت دی تھی۔ اس کے جواب میں انگلینڈ نے کھیل کے اختتام تک دوسری اننگز میں پانچ وکٹ پر دو سو ترانوے رن بنائے تھے۔ کریز پر جونز اور کیون پیٹرسن بیٹنگ تھے۔ پیٹرسن کا سکور بانوے تھا۔

پال کالنگوڈ چھیانوے رن بنا کر آؤٹ ہوئے۔ شین وارن نے انگلینڈ کی دوسری اننگز میں چار کھلاڑی آؤٹ کیئے۔

انگلینڈ کی پوری ٹیم پہلی اننگز میں 157 بناکر آؤٹ ہوگئی تھی جو آسٹریلیا کے پہلی اننگز کے سکور سے 445 رن کم تھے۔ آسٹریلیا نے اس برتری کے باوجود انگلینڈ کو فالو آن کروانے کی بجائے بیٹنگ کا فیصلہ کیا تھا۔

آسٹریلیا کی طرف سے گلین میگرا نے پہلی اننگز میں 50 رنز دے کر 6 کھلاڑیوں کو آؤٹ کیا تھا۔ انہوں نے اپنے کیریئر میں انتیسویں بار ایک اننگ میں پانچ کھلاڑی آؤٹ کیے۔

آسٹریلیا: جسٹن لینگر، میتھیو ہیڈن، رِکی پونٹنگ، ڈیمیئل مارٹن، مائیکل ہسی، مائیکل کلارک، گلکرسٹ، شین وارن، بریٹ لی، کلارک اور گلین میگرا۔

انگلینڈ: اینڈریو سٹراس، الیسٹر کُک، این بیل، پال کولنگوڈ، کیون پیٹرسن، اینڈریو فلنٹاف، گیرنٹ جونز، ایشلے جائلز، میتھیو ہوگارڈ، سٹیو ہارمیسن اور جیمز اینڈرسن۔