سچن تندولکر نے بھارت کی لڑکھڑاتی ہوئی اننگز کو سہار دیا

اس سے پہلے جنوبی افریقہ کی پہلی اننگز کے سکور تین سو اٹھائیس رنز کے جواب میں بھارت کی ٹیم میچ کے تیسرے دن اپنی پہلی اننگز میں دو سو چالیس رنز بنا کر آؤٹ ہوگئی۔

تفصیلی سکور دیکھنے کے لیے یہاں کلک کریں

کھیل کے تیسرے روز سچن تندولکر نے چھیالیس کے انفرادی سکور پر کھیلنا شروع کیا اور جب ان کا سکور تریسٹھ پر پہنچا تو وہ مکھایا نتینی کا شکار بن گئے۔

سچن کے بعد سورو گنکولی بھی بغیر کوئی رن بنائے آؤٹ ہو گئے۔ مہندر سنگھ دھونی نے چونتیس رنز بنائے۔ بھارت کی جانب سے دوسراق ابلِ ذکر سکور وی وی ایس لکشمن نے بنایا۔وہ نصف سنچری بنا کر ناٹ آؤٹ رہے۔

گزشتہ روزخراب روشنی کی وجہ سے کھیل جلدی ختم ہوگیا تھا اور کھیل کے اختتام پر بھارت نے ایک سو تین رنز بنائے تھے۔افتتاحی بلے باز وریندر سہواگ بغیر کوئی رن بناۓ پویلین واپس ہوگئے جبکہ وسیم جعفر چھبیس رن بناکر آؤٹ ہوئے۔ کپتان راہول ڈراوڈ گیارہ رن پر اینڈریو نیل کا شکار بنے۔

جنوبی افریقہ کی ٹیم نے ٹاس جیت کر پہلے بازی کا فیصلہ کیا تھا اور میچ کے دوسرے روز پوری ٹیم اپنی پہلی اننگز میں تین سو اٹھائیس رن بناکر آؤٹ ہوگئی تھی۔

جنوبی افریقہ کی طرف سے ایشول پرنس نے شاندار سنچری مکمل کی اور ایک سو اکیس رنز بناکر سری سانتھ کا شکار بنے۔ بلے باز ہرشل گبز نے بھی اچھی بلے بازی کا مظاہرہ کیا اور قیمتی ترسٹھ رنز بنائے۔

تین ٹیسٹ میچوں کی سیریز میں بھارت نے پہلا ٹیسٹ میچ جیت کر ایک صفر کی برتری حاصل کر رکھی ہے۔