عبدالرشید شکور بی بی سی اردو ڈاٹ کام، کراچی

	نسیم اشرف کے بیان پر مذہبی اور سیاسی حلقوں میں شدید ردعمل سامنے آیا ہے

عالم دین جاوید احمد غامدی کا کہنا ہے کہ کسی بھی چیز کے بارے میں فیصلہ اس بنیاد پر ہونا چاہیئے کہ وہ صحیح ہے یا غلط ۔ دنیا کیا تاثر لیتی ہے یہ کوئی ایسی چیز نہیں ہے کہ اس کو کسی درجے میں قابل اعتراض سمجھا جائے۔ ’ہم ایک آزاد قوم ہیں ہمیں اپنے نقطۂ نظر کے مطابق زندگی بسر کرنے کا حق حاصل ہے‘۔

کھلاڑیوں پر عبادت کا دباؤ غلط: پی سی بی سربراہ

جاوید احمد غامدی نے کہا کہ سوال یہ ہے کہ اگر کرکٹرز پاکستان کرکٹ بورڈ کے قواعد وضوابط پر عمل کرتے ہیں، ڈسپلن کی خلاف ورزی نہیں کرتے، اپنی پیشہ ورانہ ذمہ داری بخوبی پوری کرتے ہیں اور اچھی اخلاقی زندگی بسر کرتے ہیں تو کسی کو ان کی مذہبی سرگرمیوں پر اعتراض کا حق حاصل نہیں۔

اس سوال پر کہ کیا پاکستان کرکٹ بورڈ کے چیئرمین کے بیان کو روشن خیالی اور بنیاد پرستی کے تناظر میں دیکھا جائے گا؟ جاوید احمد غامدی نے کہا کہ بین الاقوامی سطح پر جو صورتحال پیدا ہوگئی ہے اس میں جس طرح بین الاقوامی طاقتوں کے مفادات ہیں بالکل اسی طرح بعض انتہا پسند مسلمانوں کی غلطیوں کا بھی دخل ہے۔ اس سے خاص فضا بنی ہوئی ہے جس سے اس طرح کے بیانات بھی آتے ہیں اور اس طرح کے اقدامات بھی ہوتے ہیں۔