علی سلمان بی بی سی اردو ڈاٹ کام، لاہور

	شعیب اور محمد آصف لاہور ائرپورٹ سے ذرائع ابلاغ کے نمائندوں سے بچ کر نکل گئے ہیں

دونوں کھلاڑی پی آئی اے کی پرواز سے دہلی سے لاہور پہنچے تو فوٹو گرافروں کیمرہ مین اور ذرائع ابلاغ کے نمائندے بین الاقوامی آمد کے گیٹ پر کھڑے ان کا انتظار کرتے رہے ایک پروٹوکول افسر ان کا سامان باہر لایا جس کے بعد وہ اچانک دوسری جانب چلے گئے۔

میڈیا کے اہلکار ایک طرف سے دوسری طرف بھاگتے رہے جبکہ دونوں کھلاڑی بالائی منزل پر اندرون ملک روانگی والے دروازے سے باہر نکلے۔

شیعب اور محمد آصف دونوں تیزقدموں سے چلتے ہوئے کالے شیشوں والی جیپ میں جا بیٹھے۔

دونوں کھلاڑی جتنی عجلت میں دکھائی دے رہے تھے اتنی ہی عجلت کا مظاہرہ ڈرائیور نے بھی کیا اس نے جلدی کے لیے گاڑی کے دو پہیے فٹ پاتھ پر چڑھائے اور کالے شیشوں والی گاڑی کو تیزی سے چلا کر لے گئے۔

دونوں کھلاڑیوں کے انداز سے صاف لگ رہا تھا کہ وہ نہ تو ذرائع ابلاغ کے نمائندوں سے کوئی بات کرنا چاہ رہے تھے اور نہ ہی کیمروں کا سامنا کرنا چاہتے تھے۔

کرکٹ کھلاڑیوں کے لیے چند پاکستانی شائقین بھی ائر پورٹ پر موجود تھے دونوں فاسٹ بالروں کے تیزی سے نکل جانے سے انہیں بھی مایوسی ہوئی۔

ایک شہری نے کہا کہ ’ان کا رویہ افسوسناک ہے اگر وہ سچے تھے تو انہیں میڈیا کا سامنا کرنا چاہیے تھا اور اپنی پوزیشن کی وضاحت کرنا چاہیے تھی۔‘

ایک دوسرے کرکٹ شوقین غلام رسول نے کہا کہ ’انہیں اپنی ملک و قوم کے لیے اپنی جان کی بازی لگا دینی چاہیے تھی اس کی بجائے وہ ملک کی بدنامی کا سبب بنے ہیں۔‘

محمد ارشد نے کہا کہ ’انہیں پھانسی لگا دینی چاہیے کل میچ ہونے تھے اور آج یہ واپس آگئے ہیں اس کا تو صاف مطلب ہے کہ پاکستان چیمپینز ٹرافی ہار جائے گا‘

محمد آفتاب نےاس تمام معاملے کو پاکستان اور مسلمانوں کے خلاف سازش قرار دیدیا ہے اور کہا ہے کہ ’ابھی یہ محض مشکوک قسم کے الزامات ہیں اور کوئی حتمی بات ثابت ہونے سے پہلے ہی ان کے خلاف پراپیگنڈہ شروع ہوگیا ہے۔‘