شکیل اختر بی بی سی اردو ڈاٹ کام، دلی

	گبز پر جنوبی افریقہ کرکٹ بورڈ نے چھ مہینے کے لیے پابندی عائد کی تھی

کرائم برانچ کے تفتیش کار گبز سے دلی پولیس کے ہیڈ کوارٹرز پر پوچھ گچھ کر رہے ہیں اور پولیس کا خیال ہے کہ یہ پوچھ گچھ میچ فکسنگ کے معاملے کی گتھی سلجھانے میں مدد کرے گی۔گبز کے ساتھ ان کے وکیل بھی موجود ہیں۔

گبز سے پوچھ گچھ کی تفصیلات ابھی معلوم نہیں ہیں لیکن وہ اور جنوبی افریقہ کے دوسرے کھلاڑی نکی بویے سنہ دو ہزار میں میچ فکسنگ کے سکینڈل کے سامنے آنے کے بعد سے پولیس کی انکوائری سے بچنے کے لیے دوبار ہندوستان کے دورے پر نہیں آئے ۔

اُس وقت کے جنوبی افریقہ کے کپتان ہینسی کرونيے نے ایک انکوائری میں میچ فکسنگ کا اعتراف کیا تھا۔ کرونیے نے اپنی گواہی میں بتایا تھا کہ گبز اور بویے نے بھی خراب اننگزز کھیلنے کے لیے پیسے لیے تھے۔

اس انکوائری کے اختتام پرگبز پر جنوبی افریقہ کرکٹ بورڈ نے چھ مہینے کے لیے پابندی عائد کی تھی جبکہ بویے کو بے قصوروار قرار دیا تھا۔

پولیس ہرشل گبز سے ہندوستانی کرکٹرز محمد اظہرالدین، منوج پربھاکر، اجے جدیجا اور اجے شرما کے کردار کے بارے میں بھی پوچھ گچھ کر ے گی۔ان چاروں پر میچ فکسنگ کے مختنف معاملات میں الگ الگ مدت کی پابندیاں عائد کی گئیں تھیں۔

عام تاثر یہی ہے کہ ہرشل گبز بظاہردلی پولیس سے کسی سمجھوتے اور یقین دہانی کے بعد ہی ہندوستان آئے ہیں ۔