سب سے پہلے 2003 میں نسلی تعصب سے متعلق ضابطہ متعارف کروایا گیا تھا

اگر اجلاس میں نئے ضابطہ اخلاق پر اتفاق ہوگیا تو اس کے تحت ٹیسٹ میچ کھیلنے والے ممالک کو اجازت ہوگی کہ میدان سے ان تماشائیوں کو نکلوا سکیں جو نسلی جرم کا ارتکاب کریں گے۔ ایسے تماشائیوں پر زندگی بھر میچ نہ دیکھنے کی پابندی بھی عائد کی جاسکتی ہے۔

اگر میزبان ملک نے اس ضابطے کو لاگو نہ کیا تو اسے انٹرنیشنل ٹیموں کی فہرست سے خارج کردیا جائے گا ۔

اس کے علاوہ بھی نسلی تعصب کے خاتمے کے لیئے کئی اقدامات پر غور کیا جارہا ہے۔

امکان ہے کہ نئے اقدامات کی منظوری کی صورت میں میدان میں موجود شائقین ٹیکسٹ پیغام یا ٹیلیفون ہاٹ لائن کے ذریعے حکام کو وہاں ہونے والے کسی بھی ناخوشگوار واقعہ کے بارے میں مطلع کرسکیں گے۔

آئی سی سی نے سب سے پہلے 2003 میں نسلی تعصب سے متعلق ضابطہ متعارف کروایا تھا جس کے بعد 2005 میں اس میں ترمیم کی گئی تھی۔

گزشتہ سرما میں جنوبی افریقی ٹیم کے آسٹریلیا کے دورے کے بعد ضرورت محسوس کی گئی کہ اس ضابطے میں مزید توسیع کی جائے۔ میچ کے دوران جنوبی افریقی کھلاڑیوں نے تماشائیوں کی جانب سے نسلی تعصب کے واقعات کی شکایت کی تھی۔