مناء رانا بی بی سی اردو ڈاٹ کام، لاہور

	رامی عاشور نے اپنے ٹائٹل کا کامیابی سے دفاع کیا

انفرادی مقابلوں کے فائنل میں انہوں نےاپنے ہم وطن عمر مسعود کو تین سٹریٹ گیمز میں ہرا کر ایک بار پھر عالمی جونیئر چمپئن ہونے کا اعزاز حاصل کر لیا۔

2004 میں سلام آباد میں ہونے والے عالمی جونیئر سکواش ٹورنامنٹ میں عاشور نے پاکستان کے یاسر بٹ کو فائنل میں شکست دے کر پہلی بار یہ اعزاز جیتا تھا۔

اس بار گزشتہ عالمی جونیئر کے رنراپ یاسر بٹ کوارٹر فائنل ہی میں ہار گئے جبکہ ٹورنامنٹ کے سکینڈ سیڈ پاکستان کی جونئر ٹیم کے کپتان عامر اطلس کو مصری کھلاڑی عمر مسعود نے ہرا دیا۔

پاکستان عالمی جونئر کے ٹیم ایونٹ کا دفاعی چمپئن ہے اور اتوار سےٹیم ایونٹ شروع ہو رہے ہیں۔

پاکستان کی ٹیم گزشتہ دو بار عالمی چمپئن بن چکی ہے۔ دونوں بار ان کے کوچ رحمت خان تھے جو آج کل کویت میں کوچنگ کر رہے ہیں اور پاکستانی کھلاڑیوں کی کوچنگ فہیم گل کر رہے ہیں۔

پاکستان کو اب اپنے اس اعزاز کا دفاع کرنا ہے اور یہ نہ صرف پاکستانی کھلاڑیوں کے لیے بلکہ نئے کوچ فہیم گل کے لیے بھی کڑا امتحان ہو گا۔