مناء رانا بی بی سی اردو ڈاٹ کام، لاہور

	’فیڈریشن کی اندورنی سیاست سے تنگ آکر استعفی دیا‘

بین الاقوامی سکواش میں جونئر سطح پر پاکستان کو متعدد کامیابیاں دلانے والے سکواش کوچ رحمت خان نے اپنے مستعفیٰ ہونے کی وجہ سکواش فیڈریشن کی اندورنی سیاست کو قرار دیا ہے۔

تین اپریل کو پاکستان سکواش فیڈریشن کے سالانہ اجلاس میں ان کا استعفی منظور کیے جانے کی توقع ہے۔

پاکستان سکواش فیڈریشن نے ڈائریکٹر کوچز جمیشد گل کو پہلے ہی ان کے عہدے سے سبکدوش کر دیا ہے اور یہ فیصلہ کامن ویلتھ گیمز میں پاکستان کے سکواش کے کھلاڑیوں کی ناقص کاکردگی کی بناء پر کیا گیا۔

انٹرنیشنل اولمپک کونسل کی سپورٹس فیڈریشن میں خواتین کو نمائندگی دینے کے فیصلے کے سبب ٹی وی کمپئر فرح حسین کو بھی پاکستان سکواش فیڈریشن کی ایگزیکٹو کمیٹی کا رکن بنایا جا رہا ہے۔ تین اپریل کو ہونے والے اجلاس میں ان تمام فیصلوں کی منظوری دی جائے گی۔

اس اجلاس کی صدارت ائر چیف تنویر محمود کریں گے۔ وہ اس دن سکواش فیڈریشن کے صدر کا باقاعدہ چارج بھی سنبھالیں گے۔

انہوں نے کہا کہ پانچ سال کے عرصے میں ان کی زیر تربیت پاکستان کے کھلاڑیوں نے مختلف بین الاقوامی مقابلوں میں بیس طلائی تمغے اور تقریبا اتنے ہی نقرئی تمغے حاصل کیے اور یہ کامیابیاں پاکستان کو بیس سال کے عرصے کے بعد نصیب ہوئیں۔

رحمت خان نے کہا کہ قومی کوچ ہونے کے باوجود انہیں مکمل اختیارات حاصل نہیں تھے اور انہیں فیڈریشن کی کسی کمیٹی کے اجلاس میں بھی نہیں بلایا جاتا تھا۔

انہوں نے کہا کہ وہ جونئرز کو تیار کرتے ہیں لیکن جب وہ سئنیرکے زمرے میں آتے ہیں تو سیاست کی بھینٹ چڑھ جاتے ہیں اور انہیں مزید بہتر ہونے نہیں
دیا جاتا۔

دس سال تک سکواش کے کھلاڑی جہانگیر خان کی کوچنگ کرنے والے کوچ رحمت خان کا کہنا تھا کہ انہوں نے صرف اپنے ملک کی خاطر کم مالی پیشکش پر بھی کھلاڑیوں کی تربیت کا بیڑا اٹھایا اور ایمانداری سے ان کی تربیت کی لیکن اب وہ فیڈریشن کی اندرونی سیاست سے تنگ آ چکے ہیں اس لیے استعفیٰ دے رہے ہیں۔