کوئی فٹبالروں کی بیویوں کے جوتوں کی تصویر عکسبند کررہا ہے تو کوئی ان کے ہینڈ بیگ کی

فوٹوگرافر اپنے کیمرے اٹھائے فٹبالرز کی بیویوں کے پیچھے ہیں، چاہے وہ جرمنی کے بادن بادن سٹیڈیم میں موجود ہوں یا پھر شہر کے سیاحتی مقامات کی سیر کرنے جائیں۔

فٹبالروں کی بیویاں اور گرل گرینڈز بھی اس مقابلے کے لیئے بھرپور تیاری میں ہیں۔

بادن بادن کے دریا کے کنارے موجود ایک کیمرہ مین انتہائی انہماک سے ایک جوڑے کی تصاویر لینے میں مصروف ہے۔ وہ اپنے ساتھی سے کہ رہا ہے: ’ہم سجھے یہ جینیفر اینسٹن کی طرح کوئی فلمی ستارہ ہے لیکن یہ تو ایک فٹبالر کی بیوی ہے‘۔

یانی لندن کی ایک فوٹو گرافی ایجنسی سے تعلق رکھتے ہیں۔ وہ اپنے کیمرے کے ساتھ دریا کے کنارے پر موجود ہیں اور یہاں سے وہ دریا کے دوسرے کنارے موجود فٹبالر کی بیویوں اور ان کی گرل فرینڈز کو دیکھ سکتے ہیں۔

	جنوبی افریقہ کے ’بیکہم اور وکٹوریہ‘

’کیا تم فرینک لیمپارڈ کی تصویر لینے میں کامیاب ہوئے ہو؟‘

’ہاں کوشش تو کی تھی مگر میں صرف پیچھے سے ہی ان کی تصویر لے سکا ہوں۔ یہ زیادہ اچھی تصویر نہیں ہوگی‘۔

’دیکھو دیکھو جو کول کی گرل فرینڈ بھی وہاں ہے۔ شاید وہ جو کول کے بھائی کے ساتھ ہے‘۔

’مجھے اس کے جوتوں اور ہینڈ بیگ کی تصویر لینی ہے۔ دیکھو وہ وہاں شاپنگ کررہی ہے‘۔

’دکاندار خوش نہیں ہے کہ ہم دکان کے دروازے پر تصویر لینے کھڑے ہیں۔ اس نے دروازے پر کاغذ لگانے کی بھی کوشش کی ہے لیکن وہ اچھی ہے۔ تصویر لینے کا برا نہیں مانتی‘۔

	کچھ تصاویر لینے پر تنگ ہیں تو کچھ نہ لیئے جانے پر

کچھ فوٹوگرافروں سے یہ فٹبال کے ستارے اور ان کی محبوب ہستیاں کافی تنگ ہیں۔ لیکن دیگر فوٹوگرافروں نے ایسے طریقے اپنائے ہیں جو ان لوگوں کے لیئے الجھن کا باعث بھی نہ ہوں اور پا پاراتزی بھی اپنے مقصد میں کامیاب ہوجائے۔

دوسری طرف فوٹوگرافر، ذرائع ابلاغ کے ان سوالات سے تنگ ہیں کہ آیا ان کے کیمرے فٹبالروں اور ان کی بیویوں کے لیئے کتنی مشکلات کا باعث ہیں۔

یانی اور ان کے ساتھی ڈیوڈ اور جارج کچھ خاص تصاویر لینے میں کامیاب ہوگئے ہیں اور یہ تصاویر ہیں چڑیا گھر کی سیر کے دوران ڈیوڈ بیکہم کے کھیلتے بچوں کی۔

جارج کا کہنا ہے کہ تمام فٹبالروں کی بیویوں کے درمیان مقابلہ سخت ہے۔ ’ایک مرتبہ تو دو خواتین ناراض ہی ہوگئیں کہ ہم ان کی تصویریں نہیں لے رہے اور باقی فٹبالروں کی بیویوں کی لے رہے ہیں۔ پھر ہم نے ان دونوں کے خصوصی فوٹو شوٹ کیئے‘۔

	وکٹوریہ، نینسی اور کولین کو سب سے زیادہ تنگ کرنے والی فٹبالروں کی بیویاں قرار دیا گیا ہے

اور پھر جارج اپنے فون پر ہے۔

’ہیلو۔ بیکہم لوگ اب پل پر سیدھے ہاتھ پر مڑ رہے ہیں۔ انہوں نے کہا ہے کہ اب ان کی مزید تصاویر نہ لی جائیں۔ احتیاط کرنا‘۔

اور پھر ایک اور فون کال۔

سٹو سٹو۔ اگر تصویر لینی ہے تو 70-80 گز دور سے لینا۔ انہیں معلوم نہ ہو۔ اگر ہو بھی جائے تو یہ نہ بتانا کہ تم لوگ مجھے جانتے ہو۔ انہوں نے مجھے تصویر لینے سے منع کیا تھا۔ اور میں نے کہا تھا کہ ایسا ہی ہوگا‘۔