پہلے میچ میں رونالڈو اپنا روایتی کھیل نہیں کھیلے

برازیلی فٹبال فیڈریشن کا کہنا ہے انتیس سالہ رونالڈو کا طبی معائنہ بھی کیا گیا ہے۔

فٹبال فیڈریشن کی ویب سائٹ پر جاری کردہ ایک بیان میں کہا گیا ہے کہ’طبی معائنے میں کسی قسم کی غیر معمولی کیفیت کا پتہ نہیں لگا اور رونالڈو تربیت کے لیئے مکمل طور پر فٹ ہیں‘۔

برازیل کے افتتاحی میچ میں غیر متاثر کن کارکردگی کے بعد رونالڈو کو کڑی تنقید کا سامنا کرنا پڑا تھا۔ اس میچ میں رونالڈو اپنی بھرپور فارم میں نہیں تھے اور انہیں کھیل کے انہترویں منٹ میں تبدیل کر دیا گیا تھا۔

رونالڈو کوگزشتہ سیزن کے دوران متعدد چوٹوں کا سامنا رہا ہے۔ انہوں نے اپنے کلب ریئل میڈرڈ کے لیئے آخری میچ آٹھ اپریل کو کھیلا تھا اور وہ اس میچ میں بھی ران میں چوٹ کی وجہ سے دوسرے ہاف میں میدان سے باہر چلے گئے تھے۔

یاد رہے کہ سنہ 1998 کے عالمی کپ کے فائنل میں بھی فرانس کے خلاف میچ سے قبل رونالڈو بیمار ہو گئے تھے۔ اس میچ میں ان کی کارکردگی انتہائی غیرمتاثر کن رہی تھی اور برازیل یہ فائنل تین گول سے ہارگیا تھا۔