جونٹی روڈز اپنے وقت کے سب سے بہترین فیلڈر مانے جاتے تھے۔

پاکستان کرکٹ بورڈ کے سربراہ شہریار خان نے کہا ہے کہ جونٹی روہوڈز پاکستانی ٹیم کے دورہ انگلینڈ سے دو ہفتے پہلے پاکستان کی ٹیم کی تربیت کریں گے۔

جونٹی روہوڈز 2003 میں کرکٹ سے ریٹائرمنٹ سے پہلے دنیا کے بہترین فیلڈر مانے جاتے تھے ۔جونٹی روہوڈز نے باون ٹیسٹ اور دو سو پینتالیس ایک روزہ میچوں میں جنوبی افریقہ کی نمائندگی کی۔

جونٹی روہوڈز نے اپنے میچوں کی اکثریت اس وقت کھیلی جب پاکستانی ٹیم کے موجودہ کوچ باب وولمر جنوبی افریقہ کی ٹیم کے کوچ تھے۔

پاکستان کی ٹیم کے ساتھ دو کوچ پہلے ہی کام کر رہے ہیں ۔ باب وولمر ٹیم کوچ ہیں جبکہ سابق فاسٹ بولر وقار یونس کو بولنگ کوچ بنایا گیا تھا۔

پاکستان کے کرکٹ کے سربراہ شہریار نے کہا کہ وہ نہیں سمجھتے کہ دو ہفتوں میں جونٹی روہوڈز ٹیم کی فیلڈنگ میں کوئی بہت بڑی تبدیلی لانے میں کامیاب ہوں گے لیکن ان کو یقین ہے کہ اس سے کھلاڑیوں کو بہت فاہدہ پہنچے گا۔