مناء رانا
بی بی سی اردو ڈاٹ کام لاہور |  |
| | | وریندر سہواگ اور راہول ڈراوڈ ریکارڈ سے دس رنز دور |
کم روشنی کے سبب وریندر سہواگ اور راہول ڈراوڈ پر مشتمل بھارتی اوپنگ جوڑا لاہور ٹیسٹ میچ کے چوتھے روز پہلی وکٹ کی شراکت میں سب سے زیادہ رنز بنانے کا عالمی ریکارڈ نہیں توڑ سکا۔ پہلی وکٹ کی شراکت داری کا عالمی ریکارڈ بھی بھارتی بلے بازوں پنکج رائے اور وینو منکڈ کے پاس ہے جنہوں نے یہ ریکارڈ 56- 1955 میں نیوزی لینڈ کے خلاف بنایا تھا یہ ریکارڈ چار سو تیرا رنز کا ہے اور سہواگ اور ڈراوڈ کھیل ختم ہونے پر چار سو تین رنز پر کھیل رہے تھے۔ وریندر سہواگ نے میچ کے چوتھے دن کا کھیل شروع ہوتے ہی اپنی گیارہویں ٹیسٹ سنچری بنائی اور بطور اوپنر بھارت کےلیےتیز ترین سنچری بنانے کا سنیل گواسکر کا ریکارڈ توڑ دیا۔ سہواگ نے یہ سنچری ترانوے گیندوں پر بنائی جبکہ گواسکر کی سنچری چورانوے گیندوں میں تھی۔ کم روشنی کے سبب میچ کے چوتھے دن صرف ایک سو پچاسی منٹ کا کھیل ہو سکا جس میں سینتالیس اوورز ہی کروائے جا سکے۔ جتنا بھی کھیل ہوا اس میں سہواگ کی بیٹنگ کافی دھواں دار رہی جبکہ راہول ڈراوڈ بھی میچ کے تیسرے دن کی نسبت چوتھے دن زیادہ بہتر کھیلے اور دونوں نے مل کر سکور چار سو تین تک پہنچا دیا اور یوں وہ عالمی ریکارڈ بنانے سے محض دس رنز کی دوری پر ہیں لیکن جس وقت یہ دونوں دھواں دار بیٹنگ کر رہے تھے تو قذافی سٹیڈیم میں تماشائی نہ ہونے کے برابر تھے۔ محکمہ موسمیات کے مطابق میچ کے پانچویں دن بارش کا امکان ہے اور خدشہ ہے کہ بارش ان کھلاڑیوں کے عالمی ریکارڈ بنانے کی راہ میں رکاوٹ بن جائے۔ | 
ٹرافی کےبھی امیدوار ہیں: سلیم الطاف
