مرلی دھرن نے تین وکٹیں حاصل کی ہیں

بھارتی ٹیم نے ٹاس جیت کر پہلے کھیلنے کا فیصلہ کیا تھا اور پہلے دن کے کھیل کے اختتام پر 247 رن بنائے اور اس کے چھ کھلاڑی آؤٹ ہوئے۔

بھارت کی جانب سے وی وی ایس لکشمن نے نصف سنچری سکور کی ہے اور وہ اکہتر رن بنا کر اس وقت عرفان پٹھان کے ہمراہ کریز پر موجود ہیں جنہوں نے 39 رن بنائے ہیں۔ ان دونوں بلے بازوں کی شراکت میں اب تک 64 رن بن چکے ہیں۔

بھارت کے آؤٹ ہونے والے آخری کھلاڑی مہندر سنگھ دھونی تھے جو 49 رن بنا کر مرلی دھرن کی گیند پر آؤٹ ہوئے۔ سری لنکا کی جانب سے مرلی دھرن نے تین ملنگانےدو اور بنڈارا نے ایک وکٹ حاصل کی۔

آج صبح جب میچ شروع ہوا تو بھارتی ٹیم کا آغاز اچھا نہ تھا اور پہلی وکٹ صرف اکتیس کے سکور پرگری جب گوتم گمبھیر انیس رن بنا کر ملنگا کی گیند پر آؤٹ ہوگئے۔ کپتان وریندر سہواگ بھی صرف بیس رن بنا سکے۔ انہیں بھی ملنگا نے ہی بولڈ کیا۔

بھارتی ٹیم کو اس میچ میں کپتان راہول ڈراوڈ کی خدمات حاصل نہیں ہیں اور کپتانی کی دمہ داری وریندر سہواگ کو سونپی گئی ہے۔

سٹار بلے باز سچن تندولکر ایک مرتبہ پھر ناکام رہے اور چھیاسٹھ گیندوں پر صرف تیئس رن بنا کر مرلی دھرن کا پہلا شکار بنے۔ اس وقت بھارت کا سکور 88 رن تھا۔ اسی سکور پر یوراج سنگھ بنا کوئی رن بنائے مرلی دھرن کی گیند پر سماراویرا کے ہاتھوں کیچ ہوگئے۔ سورو گنگولی کی جگہ ٹیم میں شامل ہونے والے محمد کیف صرف 4 رن بنا سکے اور بنڈارا کی گیند پر کیچ ہو گئے۔

پچانوے رن پر پانچ وکٹ گرنے کے بعد لکشمن اور دھونی نے بھارتی اننگز کو سہارا دیا اور محتاظ انداز سے کھیلتے ہوئے بھارتی ٹیم کو مشکلات سے نکالنے کی کوشش کی۔ دونوں بلے بازوں نے چھٹی وکٹ کی شراکت میں 86 رن بنائے۔

بھارتی ٹیم: گوتم گمبھیر، وریندر سہواگ، وی وی ایس لکشمن، سچن تندولکر، یوراج سنگھ، محمد کیف، مہندر دھونی، عرفان پٹھان، اجیت اگرکار، انیل کمبلے، ہربھجن سنگھ

سری لنکن ٹیم: مارون اتاپتو، مہیلا جیا وردھنے، تھارانگا، کمارا سنگاکارا، سمارا ویرا، جیہان مبارک، تلکارتنے دلشان، سی بنڈارا، مہروف، مرلی دھرن، ملنگا