عبدالرشید شکور بی بی سی اردو ڈاٹ کام ملتان

	پاکستان کے دو سابق کپتان رمیز راجہ اور وقار یونس

بی بی سی سے بات کرتے ہوئے رمیز راجہ نے کہا کہ پاکستانی ٹیم نے ٹاس جیتنے کا فائدہ گنوادیا ہے۔ 274 کا سکور وکٹ کی مناسبت سے بہت کم ہے۔ یہ وکٹ بیٹسمینوں کے لیے تیار کی گئی تھی لیکن بیک فائر ہوگیا۔ مایوس کن بیٹنگ کے بعد بولنگ پر دباؤ آگیا ہے اور پاکستانی ٹیم کے لیے اب میچ بچانا مشکل ہوگیا ہے۔

رمیز راجہ کے خیال میں کسی بھی ٹیم کے لیے پہلی اننگز مستحکم ہونا بہت ضروری ہے۔ انگلینڈ کی ایشیز میں شاندار کارکردگی کی وجہ یہی تھی کہ اس کے بیٹسمینوں نے پہلی اننگز میں بڑا سکور کیا۔

رمیز راجہ کا ملتان ٹیسٹ کی وکٹ کے بارے میں کہنا ہے کہ یہ بہت سلو وکٹ ہے۔ ان کے خیال میں وکٹوں کی تیاری کے لیے کسی ماہر کیوریٹر کی خدمات کا حاصل کیا جانا بہت ضروری تھا۔ اس سلسلے میں اینڈی اٹکنسن موزوں تھے۔ ہمارے کیوریٹر اچھے ہیں لیکن زیادہ پروفیشنل نہیں ہیں۔

رمیز راجہ کا کہنا ہے کہ انگش بولرز نے ذہانت سے بولنگ کی۔

سابق فاسٹ بولر وقار یونس بھی یہی رائے رکھتے ہیں۔ ان کا کہنا ہے کہ یہ بیٹنگ وکٹ ہے جس پر صبروتحمل کے ساتھ بولنگ کی ضرورت ہوتی ہے جو انگلش بولرز نے کی ان کی فیلڈ پلیسنگ بھی بہت اچھی رہی۔

وقار یونس کے خیال میں اس وقت ملتان ٹیسٹ 70 فیصد انگلینڈ کے حق میں ہے۔