گنگولی کو نہ صرف کپتانی سے ہٹایا گیا بلکہ ٹیم سے بھی نکال دیا گیا

بھارتی ٹیم میں محمد کیف اور اکیس سالہ نئے کھلاڑی وکرم سنگھ کو شامل کیا گیا ہے۔ محمد کیف زخمی ہونے کے سبب سیریز کے پہلے پانچ میچ نہیں کھیل سکے تھے۔

کیف اور وکرم سنگھ کی جگہ بنانے کے لیے وی پی راؤ اور جے پی یادو کو ڈراپ کر دیا گیا ہے۔ بھارتی سلیشکن کمیٹی کےسربراہ کرن مورے کا کہنا تھا کہ ’راؤ اور یادو کو ڈراپ کرنا بہت مشکل تھا لیکن کیف ایک شاندار کھلاڑی ہے اور صحتیاب ہونے کے بعد اسے ٹیم میں آنا ہی تھا۔ وکرم سنگھ بھارتی کرکٹ کا مستقبل ہے اور ہم اس کی کارکردگی کا بغور جائزہ لیں گے‘۔

ان تبدیلیوں کے باوجود ون ڈے کرکٹ میں دس ہزار رن بنانے والے سورو گنگولی کی بھارتی ٹیم میں جگہ بنتی دکھائی نہیں دے رہی ہے۔ گنگولی نے اپنی خراب فارم اور کہنی کی تکلیف سے صحتیابی کے بعد حال ہی میں بہتر بلے بازی کا مظاہر کرتے ہوئے مقامی میچوں میں ایک سنچری بھی بنائی تھی۔