 | | | گریگ چیپل نے گنگولی کے خلاف ایک ای میل بھیجا تھا |
کوچ گریگ چیپل اور کپتان گنگولی منگل کو بھارت میں کرکٹ کنٹرول بورڈ کی کمیٹی کے سامنے پیش ہو رہے ہیں۔ گریگ چیپل اور گنگولی کے درمیان جھگڑا کوچ کی طرف سے کرکٹ بورڈ کو بھیجی گئی ایک ای میل کے افشاں ہوجانے کے بعد سامنے آیا تھا۔ ذرائع ابلاغ میں شائع ہونے والی خبروں کے مطابق گریگ چیپل نے اپنی ای میل میں کہا ہے کہ گنگولی سن دوہزار سے کوئی خاطر خواہ کارکردگی نہیں دکھا سکے ہیں اور اس لیے ان کی جگہ کوئی دوسرا کپتان مقرر کیا جانا چاہیے۔ ان ذرائع کا کہنا ہے کہ کہ چیپل نے اپنی ای میل میں کہا ہے کہ گنگولی کو ٹیم میں شامل نہیں کیا جانا چاہیے کیونکہ انہوں نے ٹیم کی یگانگت کو نقصان پہنچایا ہے اور وہ ایک عرصے سے خود بھی فارم میں نہیں ہیں۔ ایک عرصے کی پابندی کے بعد ٹیم میں شامل کییے جانے والے گنگولی کا کہنا ہے کہ وہ وہ اپنی صفائی پیش کریں گے۔ کپتان اور کوچ کے درمیان اس تنازع نے کھلاڑیوں میں بھی تفریق پیدا کر دی ہے جس کے بعد بھارتی کرکٹ بورڈ کے سربراہ نے بھارتی کرکٹ ٹیم اور بورڈ کے حکام کو ہدایت کی ہے کہ وہ کوچ گریگ چیپل اور کپتان سوراو گنگولی میں جاری کشمکش کے بارے میں کوئی بیان دینے سے گریز کریں۔ منگل کو سنیل گوسکر، روی شاشتری، شری نیوس وینکھٹ راگھونی اور بورڈ کے صدر کے ساتھ ساتھ کسریٹری جگموہن ڈالمیا پر مشتمل کمیٹی کوچ اور کپتان سے ملاقات کرے گی۔ بی سی سی آئی کے سابق صدر راج سنگھ دنگر پور نے بی بی سی کو بتایا ہے کہ چیپل نے بورڈ کو اپنی رائے سے آگاہ کر کے انتہائی مناسب قدم اٹھایا ہے۔ انہوں نہ کہا ہے کہ گریگ بھارتی کرکٹ کو کوئی نقصان نہیں پہنچائیں گے لیکن وہ دباؤ میں آ کر کسی فیصلے کو قبول بھی نہیں کریں گے۔ اگر وہ کہتے ہیں کہ کھلاڑیوں کی فٹنس اور کھیل کے معیار میں کوئی کمی نہیں چھوڑی جائے گی، تو ایسا ہی ہو گا۔ | 
یہ صفحہ دوست کو ای میل کیجیئے
پرِنٹ کریں
