چیپل نے گنگولی کو کپتانی کے لیے ’جسمانی اور ذہنی طور ان فٹ‘ قرار دیا ہے

بھارتی کرکٹ بورڈ کے صدر رنبیر سنگھ مہندرا نے گریگ چیپل کی جانب سے بھیجی گئی ایک ای میل کی وصولی کی تصدیق تو کی ہے تاہم انہوں نے یہ نہیں بتایا کہ اس ای میل میں کیا لکھا گیا ہے۔

بھارتی میڈیا کا دعوٰی ہے کہ اس ای میل میں چیپل نے گنگولی کو کپتانی کے لیے ’جسمانی اور ذہنی طور ان فٹ‘ قرار دیا ہے اور کہا ہے کہ وہ ٹیم کے کچھ کھلاڑیوں کی نظر میں ’اپنا وقار کھو چکے ہیں‘۔

سورو گنگولی نے زمبابوے کے خلاف پہلے ٹیسٹ سے قبل کہا تھا کہ ان سے کپتانی کے عہدے سے مستعفٰی ہونے کیلیے کہا گیا تھا جس پر چیپل نے کہا تھا کہ وہ خراب فارم کا شکار گنگولی کا حوصلہ بڑھانے کی کوشش کر ہے تھے۔

چیپل کا کہنا تھا کہ ’یہ مایوس کن ہے کہ میری اور کپتان کی نجی گفتگو کی بناء پر لوگوں نے اندازے قائم کیے۔ اس گفتگو کے بارے میں جو بھی لکھا گیا اس میں سے زیادہ تر غیر جانبدارانہ نہیں تھا‘۔

امید کی جا رہی ہے کہ گنگولی اور چیپل کا یہ معاملہ ممبئی میں آئندہ منگل کو ہونے والے اجلاس میں طے پا جائے گا جب بھارتی ٹیم کی گریگ چیپل کی تقرری سے لے کر اب تک کی کارکردگی کا جائزہ لیا جائے گا۔