 | | | ہربھجن سنگھ نے انسٹھ رن کے عوض چار وکٹ حاصل کیے |
بلاوایو میں کھیلے جانے والے پہلے ٹیسٹ میچ میں بھارت نے زمبابوے کو ایک اننگز اور 90 رن سے شکست دے دی ہے۔ میچ کے تیسرے دن جب کھیل ختم ہوا تھا تو زمبابوے کا سکور سات وکٹ کے نقصان پر سڑسٹھ رن تھا اور اسے اننگز کی شکست سے بچنے کے لیے مزید 208 رن کی ضرورت تھی اور بھارت کی فتح کے امکانات نہایت روشن تھے۔ چوتھے دن زمبابوے کے نچلے درجے کے بلے بازوں نے اچھی بلے بازی کا مظاہرہ کیا اور مزید 118 رن بنا ڈالے تاہم وہ اپنی ٹیم کو اننگز کی شکست سے نہ بچا سکے۔ زمبابوے کی جانب سے دسویں وکٹ کیلیے سنتالیس رن کی پارٹنر شپ ہوئی۔ زمبابوے کے کپتان ٹٹنڈا ٹائیبو باون رن بنا کر نمایاں رہے۔ یہ ٹیسٹ کرکٹ میں ان کی نویں نصف سنچری تھی۔ بھارت کی جانب سے ہربھجن سنگھ نے انسٹھ رن کے عوض چار وکٹ حاصل کیے۔ بھارتی بولر عرفان پٹھان کو مین آف دی میچ قرار دیا گیا۔ انہوں نے اس میچ میں 111 رن کے عوض نو وکٹیں حاصل کیں۔ بھارت نے اپنی پہلی اننگز میں 554 رن بنائے تھے اور وی وی ایس لکشمن اور سارو گنگولی نے سنچریاں بنائی تھیں۔ اس سیریز کا دوسرا اور آخری ٹیسٹ میچ منگل سے ہرارے میں شروع ہو گا۔ | 
یہ صفحہ دوست کو ای میل کیجیئے
پرِنٹ کریں
