جے سوریا نے ون ڈے میں 10000 رن مکمل کر لیے

بھارت کے افتتاحی بلے باز وریندر سہواگ نے دھواں دار بلے بازی کرتے ہوئے صرف بائیس گیندوں پر اڑتالیس رن بنائے۔ ان کی اننگز میں نو چوکے اور ایک چھکا شامل تھا۔ وہ چمندا واس کی گیند پر بولڈ ہوئے۔ بھارت کے دوسرے آؤٹ ہونے والے کھلاڑی سوروگنگولی تھے جو چھبیس رن بنا کر دلشان کی گیند پر ایل بی ڈبلیو ہوئے۔

یوراج سنگھ اٹھاون بالوں پر بیالیس رن بنا کر آؤٹ ہوئے جبکہ کپتان راہول ڈراوڈ نناوے گیندوں پر بہتر رن بنا کر رن آؤٹ ہوئے۔ کپتان کے آؤٹ ہونے کے بعد اگلے دو بلے باز دہونی اور عرفان پٹھان جلد ہی آؤٹ ہو گئے۔ اس کے بعد محمد کیف بھی اکتیس رن بناسکے۔

اس سے قبل سری لنکا نے ٹاس جیت کر پہلے کھیلتے ہوئے نو کھلاڑیوں کے نقصان پر دو سو اکیاسی رن بنائے۔ سری لنکا کی جانب سے جے وردھنے، رسل آرنلڈ اور جے سوریا نے شاندار بلے بازی کا مظاہرہ کرتے ہوئے نصف سنچریاں سکور کیں۔ جے وردھنے 83 ، جے سوریا 67 جبکہ رسل آرنلڈ 64 رن بنا کر آؤٹ ہوئے۔

اپنی اننگز کے دوران جے سوریا نے ایک روزہ بین الاقوامی مقابلوں میں اپنے دس ہزار رن بھی مکمل کر لیے۔انہوں نے یہ کارنامہ اپنے تین سو سینتیسویں میچ میں سر انجام دیا۔ وہ اس مقام پر پہنچنے والے دنیا کے چوتھے کھلاڑی ہیں۔

سری لنکا نے ٹاس جیت کر پہلے کھیلنے کا فیصلہ کیا اور جے سوریا اور کپتان اتاپتو نے اپنی ٹیم کو ایک تیز آغاز فراہم کیا۔ اتاپتوگیارہ رن بنا کر اشیش نہرا کی گیند پر بولڈ ہوئے جبکہ دلہارا کو نہرا نے ہی نو کے انفرادی سکور پر ایل بی ڈبلیو کیا۔ سنگاکارا آٹھ رن بنا کر نہرا کا تیسرا شکار بنے۔ دلشان کو سات کے سکور پر نہرا نے ہی آؤٹ کیا۔اپل چندانا کو دو رن پر ہربھجن سنگھ نے نہرا کی گیند پر کیچ کیا۔ مرلی دھرن آؤٹ ہونے والے آخری کھلاڑی تھے۔ وہ بنا کوئی رن بنائے رن آؤٹ ہوئے۔ چمندا واس 18 رن پر ناٹ آؤٹ رہے۔

بھارت کی جانب سے اشیش نہرا نے انسٹھ رن دے کر چھ وکٹیں حاصل کیں جبکہ تین سری لنکن کھلاڑی رن آؤٹ ہوئے۔

بھارت نے اپنی ٹیم میں بولنگ کے شعبے کو مضبوط کرنے کے لیے ہربھجن سنگھ کو ٹیم میں شامل کیا جبکہ سری لنکن ٹیم میں فاسٹ بالر چمندا واس کی واپسی ہوئی۔

دونوں ممالک کی ٹیمیں

سری لنکا: مارون اتاپتو، سنتھ جے سوریا، کمارا سنگاکارا، مہیلا جے وردھنے، تلکا رتنے دلشان، رسل آرنلڈ، دلہارا، اپل چندنا، چمنا واس، فرویز معروف، مرلی دھرن

بھارت: راہول ڈراوڈ، وریندر سہواگ، سورو گنگولی، یوراج سنگھ، محمد کیف، مہندر دھونی، ہربھجن سنگھ، عرفان پٹھان، انیل کمبلے، ظہیر خان، اشیش نہرا